Մոսկվայի բիզնեսի եւ իրավունքի ինստիտուտի Երեւանյան մասնաճյուղի 12 ուսանողներ արդեն ստացել են դիպլոմ, սակայն Եվրասիայի միջազգային ինստիտուտի: Այս մասին NEWS.am-ի հետ զրույցում ասաց ուսանողներից Վահեն, որը մեկն է այն 55 ուսանողներից, ովքեր սովորել են ռուսաստանյան բուհի Երեւանյան մասնաճյուղում, սակայն օրերից մի օր ռեկտոր Աշոտ Առաքելյանը անհետացել է, իսկ իրենք էլ մնացել առանց դիպլոմի: 

«12 ուսանողի հարցը լուծվեց, սակայն մենք քննություն տվեցինք եւ ստացանք Եվրասիայի դիպլոմ, մյուսներն էլ դեռ առանց դիպլոմի են, որովհետեւ այլ համալսարանի դիպլոմ չեն ուզում: Իսկ մյուս 25 ուսանողի էլ Մոսկվայի ինստիտուտը խաբել է, նրանցից գումար վերցրել հեռավար ուսուցման համար, սակայն հետո պատճառաբանել, թե չեք կարող սովորել, քանի որ ձեր ռեկտորը պարտք է մեզ»,- ասաց Վահեն:

Խաբված 55 ուսանողներն այժմ փորձում են գտնել ռեկտորին եւ հարցը լուծել դատական կարգով, սակայն արդեն 2 տարի Աշոտ Առաքելյանը չի պատասխանում ոչ մի զանգի, վաճառել է բնակարանն ու հեռացել: