Հայաստանում ապրանքաշրջանառության հարկի կրճատմամբ մեքենաներ ներկրողները դուրս կգան «ստվերից»: Այդ մասին NEWS.am-ի թղթակցի հետ զրույցում հայտնել «Ավտոներկրողների պաշտպանության լիգա» հասարակական կազմակերպության նախագահ Տիգրան Հովհաննիսյանը: Նրա խոսքով՝ 3,5-ից մինչեւ 1 տոկոս իջեցումը շատ կարեւոր է. հաշվի առնելով, որ ավտոներկրողները մեծ շրջանառություն ունեն, տարբերությունը կարող է կազմել 100-200 հազար դրամ:
«Փոխարենն այժմ մենք կարող ենք հանգիստ մեքենաներ ներկրել մեր անունով, չենք մտածի, թե ում անունով է հարկավոր գրանցել այն եւ ում պետք է խնդրել այդ մասին»,- հավելել է Հովհաննիսյանը: Նշենք, որ այժմ մեքենաների ներկրողները, ովքեր Հովհաննիսյանի կազմակերպության անդամ են, եւ եթե տարեկան ավելի քան մեկ մեքենա են ներկրում, ապա ներկրումը գրանցում են հարազատների կամ ծանոթների անունով: «Հույս ունենք, որ ընտանեկան բիզնեսի համար նախատեսված արտոնություններից էլ կարող ենք օգտվել»,- եզրափակել է Հովհաննիսյանը:
Հիշեցնենք, որ առեւտրի սուբյեկտների համար շրջանառության հարկի իջեցումը 3,5-ից 1 տոկոսի, ինչպես նաեւ ընտանեկան բիզնեսի հարկերից ազատումը պետք է ուժի մեջ մտնեն հոկտեմբերի մեկից:
