Մալազիական օդանավի վթարից հետո Նիդերլանդների իշխանություններն ուժեղացնում են Ռուսաստանի նկատմամբ ճնշումը: Նիդերլանդների վարչապետ Մարկ Ռյուտեն Ռուսաստանի նախագահ Վլադիմիր Պուտինի հետ հեռախոսազրույցում կոչ է արել Մոսկվային համագործակցել օդանավի վթարի հանգամանքները պարզելու գործընթացում, որի ուղեւորիները մեծամասամբ Հոլանդիայի քաղաքացիներ էին:
«Ես նրան ասացի, սա իր վերջին շանսն է ցույց տալ աշխարհին,որ ինքն իսկապես ցանկանում է օգնել»,- Ռյուտեի խոսքերը մեջբերում է «Reuters» գործակալությունը: Նիդերլանդների կառավարության նախագահի խոսքով՝ նա հստակ հասկացրել է, որ այժմ Պուտինը պատասխանատու է Ուկրաինայում ռուսամետ ակտիվիստների գործողությունների համար:
Մարկ Ռյուտեն նաեւ պատմել է, որ իրեն զարմացրել են «անամոթ ռուսամետ անջատողականները», որոնք լուսանկարվում էին օդանավի վթարի վայրում՝ զոհերին պատկանող իրերի հետ միասին, հաղորդում է «AFP» գործակալությունը: Այդ մասին նաեւ հայտարարել է Նիդերլանդների արտգործնախարար Ֆրանս Թիմերմանսն Ուկրաինայի նախագահ Պյոտր Պորոշենկոյի հետ հանդիպման ընթացքում:
«Մեզ ապշեցրել են լուրերն այն մասին, որ մարմինները կարող են տեղափոխել»,- նախարարի խոսքերը մեջբերում է Ուկրաինայի նախագահի մամուլի ծառայությունը. «Խնդրում եմ, օգնեք մեզ վերադարձնել մեր մարդկանց տուն, որպեսզի ըստ արժանվույն նրանց հողին հանձնենք»: