Սամցխե-Ջավախքի եւ Քվեմո-Քարթլիի Հայկական Հասարակական Կազմակերպությունների Խորհուրդը դատապարտում է կատարվածը եւ պահանջում է Վրաստանի իշխանություններից օրենքի ողջ խստությամբ պատժել հայ առաքելական եկեղեցու վրա հարձակված հանցագործներին եւ տեղի ունեցածի առիթով հանդես գալ պաշտոնական հայտարարությամբ:
Կազմակերպությունը հայտարարություն է տարածել, որում, մասնավորապես ասվում է. «Հուլիսի 19-ին, երեկոյան Թբիլիսիի Սուրբ Էջմիածին եկեղեցու բակում, ազգային եւ կրոնական ատելությամբ դրդված մի խումբ վրացիներ (մոտ 50 հոգի), իրականացրել են ծրագրված հարձակում Թբիլիսիի Սուրբ Էջմիածին եկեղեցու հոգեւոր դասի, թեմի պաշտոնեության եւ հավատացյալների վրա:
Հարձակման ընթացքում տուժել են ինչպես հոգեւորականները, այնպես էլ եկեղեցու հավատացյալները: Հարձակման պատճառով մարմնական վնասվածքներ են ստացել եկեղեցու հոգեւորականները եւ Առաջնորդարանի աշխատակիցները:
Սամցխե-Ջավախքի եւ Քվեմո-Քարթլիի Հայկական Հասարակական Կազմակերպությունների Խորհուրդը դատապարտում է կատարվածը եւ պահանջում է Վրաստանի իշխանություններից օրենքի ողջ խստությամբ պատժել հայ առաքելական եկեղեցու վրա հարձակված հանցագործներին եւ տեղի ունեցածի առիթով հանդես գալ պաշտոնական հայտարարությամբ:
Սամցխե-Ջավախք եւ Քվեմո-Քարթլի տարածաշրջանների հայ հասարակությունը խորապես մտահոգված եւ վրդովված է տեղի ունեցածով, քանզի բոլորը քաջ գիտակցում են, որ տվյալ հարձակումը տեղի է ունեցել կրոնական եւ ազգային ատելության հողի վրա, ինչի սերմերը ցավոք վաղուց արդեն սերմանվում են վրաց հասարակության մեջ:
Այն ինչ տեղի է ունեցել Թբիլիսիի Սբ. Էջմիածին եկեղեցու բակում քայլ է ուղղված մեր երկրի Եվրոմիությանն անդամակցության, հասարակական կայունության եւ պետականության դեմ։ Այդ իսկ պատճառով իշխանությունները պարտավոր են ի ցույց երկրի ողջ հասարակության օրենքի ողջ խստությամբ իրական պատասխանատվության ենթարկել հարձակման պատվիրատուներին, կազմակերպիչներին եւ հարձակումը կատարողներին:
Կոչ ենք անում նաեւ Վրաստանում գործող բոլոր միջազգային իրավապաշտպան կազմակերպություններին, Վրաստանում հավատարմագրված դիվանագիտական կառույցներին, Եվրոպական դիվանագիտական ներկայացուցչություններին, ուշադրությամբ հետեւել ազգային եւ կրոնական հողի վրա տեղի ունեցած ոճրագործության բացահայտման ու մեղավորների պատժման գործընթացին»:
