Ազգային ժողովի ՀՀԿ խմբակցության պատգամավոր Գարեգին Նուշիկյանը կարծում է, որ ռուսաստանաբնակ հայ բարերար, ծնունդով արցախցի Լեւոն Հայրապետյանին կալանավորելը թյուրիմացության արդյունք է: NEWS.am-ի հետ զրույցում պատգամավորը հերքեց, որ կարող է՝ սա Ադրբեջանի պատվերը լինի:
«Ընդհանուր առմամբ երեւույթին շատ վատ եմ վերաբերվում, շատ լավ մարդ է, շատ բան է արել Հայաստանում, մասնավորապես Արցախում: Անձամբ ճանաչում եմ Լեւոն Հայրապետյանին, մի քանի անգամ առիթ եմ ունեցել՝ շփվելու նրա հետ: Բայց թե ինչ ենթատեքստ ունի, չեմ կարող ասել, որովհետեւ տեղյակ չեմ»,- ասաց նա:
Մեր դիտարկմանը, թե շատերը կարծում են, որ սա Ադրբեջանի պատվերն է՝ Գարեգին Նուշիկյանը պատասխանեց. «Դժվար, չեմ կարծում, որովհետեւ եթե Ադրբեջանի պատվերով նման քայլեր հնարավոր լիներ իրականացնել, ապա շատ այլ մարդկանց նկատմամբ կարվեր, օրինակ հենց նույն Սամվել Կարապետյանի, որովհետեւ նա էլ որոշակի բաներ է անում Հայաստանի համար: Չեմ կարծում, որ Ադրբեջանն այդքան հնարավորություն ունենա: Շատ հնարավոր է, որ թյուրիմացություն լինի»:
Նշենք, որ Լեւոն Հայրապետյանի եղբայրը պնդում է, որ սա քաղաքական հաշվեհարդար է, իսկ հետեւում էլ կանգնած է Ադրբեջանը:
Հիշեցնենք, որ Ռուսաստանի Քննչական կոմիտեն Լեւոն Հայրապետյանին մեղադրանք է առաջադրվել երկու հոդվածներով` ՌԴ քրեական օրենսգրքի 160-րդ (վատնում) եւ 174-րդ (հանցավոր ճանապարհով ստացված եկամուտների օրինականացում) հոդվածներով: Նա կալանավորված է:
