ԵԱՀԿ Մինսկի խմբի համանախագահներն անհանգստացած են Հայաստանի եւ Ադրբեջանի սահմանին, ինչպես նաեւ շփման գծում ցանկացած կորստի առնչությամբ: Այս մասին ԱՊԱ գործակալությանը տված հարցազրույցում հայտարարել է ԵԱՀԿ ՄԽ ամերիկացի համանախագահ Ջեյմս Ուորլիքը:
Նա հավելել է, որ միջադեպերի թիվը, որոնք հանգենում են մահվան եւ վիրավորվելու, հետընթաց է կայուն խաղաղության հասնելու ուղղությամբ կողմերի հետ աշխատանքի իրենց ջանքերում:
«ԱՄՆ-ն եւ Մինսկի խմբի համանախագահները պատրաստ են կողմերին օգնել ղարաբաղյան հակամարտության խաղաղ կարգավորման ուղիներ գտնելու հարցում: Հակամարտությունը ռազմական լուծում չունի: Համանախագահները ցանկանում են Բրյուսելում հանդիպել նախարարներ Էլմար Մամեդյարովի եւ Էդվարդ Նալբանդյանի հետ՝ հետագա քայլերը քննարկելու համար»,- նշել է Ուորլիքը (խմբ. հանդիպումները նախանշված են այսօր՝ հուլիսի 22-ին):
Միաժամանակ, նա հույս է հայտնել, որ նախագահները կընդունեն Փարիզում հանդիպելու առաջարկը: «Երբ նոյեմբերին նախագահները հանդիպեցին Վիեննայում, մենք ականատես եղանք այն հանգամանքին, որ առաջընթացը հնարավոր է: Մենք հավատում ենք, որ այս քննարկումների շարունակությունը կարեւոր քայլ կդառնա խաղաղության հասնելու ճանապարհին: Համանախագահները պատրաստ են օգնել ցանկացած միջոցներով»,- ամփոփել է Ջեյմս Ուորլիքը:
