Ազգային ժողովի ՀՀԿ խմբակցության պատգամավոր Նահապետ Գեւորգյանը խոսել է այսօր՝ հուլիսի 22-ին, Արցախում ականի վրա պայթյունի հետեւանքով վիրավորված Արմավիրի քաղաքապետ Ռուբեն Խլղաթյանի հետ, սակայն չգիտի, թե ինչու էր վերջինս Քաշաթաղ մեկնել:
«Նորմալ վիճակում է, վնասվածքներ ունի, բայց գիտակցության էր, ինձ հետ խոսեց»,- NEWS.am-ի հետ զրույցում ասաց ՀՀԿ-ական պատգամավորը, որն այցելել էր «Էրեբունի» բժշկական կենտրոն՝ տեսակցելու ընկերոջը:
Թե ինչու էր Արմավիրի քաղաքապետը Քաշաթաղ մեկնել, Նահապետ Գեւորգյանը հրաժարվեց որեւէ բան ասել. «Ըտենց բաներ ինձի մի հարցրա, ամոթ ա»:
Նշենք, որ մեր տեղեկություններով՝ Ռուբեն Խլղաթյանը որսի էր գնացել Լեռնային Ղարաբաղի Հանրապետություն:
NEWS.am-ի թղթակիցը հաղորդում է, որ հիվանդանոցում են վիրավորների հարազատներն ու մեծ թվով արմավիրցիներ:
Հիշեցնենք, որ դեպքը տեղի է ունեցել հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է: Վթարի հետեւանքով վարորդը տեղում զոհվել է, իսկ ուղեւորներ Ռուբեն Խլղաթյանը, Արթուր Բաղդասարյանը եւ Գառնիկ Ավետիսյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երեւանի «Էրեբունի» բժշկական կենտրոն: