Քանաքեռ-Զեյթուն վարչական շրջանի Լամբադա կամրջի մոտ այսօր՝ հուլիսի 22-ին, ժամը 19:00-ի մոտ ավտոբուսի վթարի հետեւանքով թիվ 1 համալսարանական հիվանդանոց տեղափոխված 4 ուղեւորների մեջ անչափահաս երեխա կա:
Ինչպես NEWS.am-ին ասաց Երեւանի Մխիթար Հերացու անվան պետական բժշկական համալսարանի մամուլի պատասխանատու Ալեքսանդրա Հարությունյանը, իրենց մոտ են տեղափոխվել 2 կին, 1 տղամարդ եւ 14 տարեկան տղա երեխա:
«Այս պահին հետազոտվում են, արտառոց ոչինչ չկա, ոչ մեկի կյանքին վտանգ չի սպառնում»,- ասաց Ալեքսանդրա Հարությունյանը:
«Սուրբ Գրիգոր Լուսավորիչ» բժշկական կենտրոնից էլ մեզ հայտնեցին, որ իրենց մոտ տեղափոխված 5 ուղեւորները նույնպես այս պահին հետազոտվում են: Տուժածների մեջ հղի կին կա. նրա վիճակը լավ է:
Ավելի վաղ NEWS.am-ը, վկայակոչելով ԱԻՆ-ին, հայտնել էր, որ «Բոգդան» մակնիշի 267 համարի ավտոբուսը, որը սպասարկում է Երեւան-Աբովյան երթուղին, ժամը 19:00-ի սահմաններում հարվածել է Mercedes մակնիշի մեքենայի, այնուհետեւ գովազդային վահանակի: Վթարի հետեւանքով տուժել էր 15 ուղեւոր, որից 9-ին տեղափոխել էին հիվանդանոց:
Լուսանկարը՝ Արսեն Սարգսյանի/NEWS.am