Բրիտանիան շարունակում է Ռուսաստան արտահանել միլիոնավոր դոլարների զենք եւ երկակի նշանակությամբ տեխնոլոգիաներ ` չնայած այն մտավախությանը, որ Ռուսաստանը զինում է Ուկրաինայի արեւելքի անջատականներին, հայտարարել է Բրիտանիայի խորհրդարանի կոմիտեն:
Ըստ Համայնքների պալատի զենքի վերահսկողության կոմիտեի տվյալի` Ռուսաստան առնվազն 225 միլիոն դոլարի ապրանքների արտահանման 251 արտոնագիր շարունակում է գործել: Միայն 31 արտոնագիր է կասեցվել, փոխանցում է BBC-ի ռուսական ծառայությունը:
Բրիտանիայի կառավարությունը ավելի վաղ հայտարարել էր Ռուսաստան ապրանքներ եւ տեխնոլոգիաներ մատակարարելը դադարեցնելու մտադրության մասին, որոնք կարող են գործածվել Ուկրաինայի արեւելքի կոնֆլիկտում:
Զենքի շարունակվող մատակարարումների մասին հայտնի էր դարձել, երբ Մեծ Բրիտանիայի վարչապետ Դեյվիդ Քեմերոնը սուր քննադատության է ենթարկել Ֆրանսիայի իշխանությունների որոշումը` Ռուսաստանի հետ ռազմական ոլորտում առեւտրային հարաբերությունները շարունակելու վերաբերյալ, չնայած Մոսկվայի կողմից անջատականների աջակցությանը:
