Գերմանիայում թուրքական «Deutsch-Turkisches Journal» պարբերականը մի քանի օր առաջ Լեռնային Ղարաբաղում վնասազերծված ադրբեջանցի դիվերսանտների պաշտպանությամբ է հանդես եկել:
Պարբերականը կարծում է, որ «քանի որ Լեռնային Ղարաբաղը պաշտոնապես Ադրբեջանի մի մասն է», այնտեղ կարող են ազատորեն մտնել վերջինիս քաղաքացիները: Հետեւապես, հայկական կողմի՝ ապօրինի ներթափանցման մեղադրանքները անհիմն են: Այն մասին՝ կարո՞ղ են դիվերսանտները «իրենց հայրենիքում» մարդ սպանել, պարբերականը չի գրում:
Դրա փոխարեն, հոդվածի հեղինակը կախվում է Եվրոպա-ադրբեջանական միության ներկայացուցիչ Լիոնել Ցետերի արտահայտություններից. վերջինս հայկական կողմին մեղադրել է, որ երկու դիվերսանտների ձերբակալած զինվորները դիմակներով են եղել, ինչը անթույլատրելի է: Իսկ այն մասին՝ թույլատրելի՞ է արդյոք, 17-ամյա պատանու սպանությունը եւ կնոջը վրա կրակելը, Ցետերը լռում է: Կազմակերպության հայտարարությունում այդ մասին ասվում է միայն իմիջիայլոց՝ որպես փաստի արձանագրում:
Այնուհետեւ ասվում է, որ Հայաստանի նկատմամբ ՄԱԿ-ի անվտանգության խորհրդի բանաձեւ է ընդունվել, որտեղ «հայկական ուժերին կոչ է արվում գրավված տարածքներից դուրս բերել զորքերը»: Այն մասին, որ հակամարտության կարգավորումը իրականցվում է ԵԱՀԿ Մինսկի խմբի շրջանակներում, կրկին ասվում է իմիջիայլոց, հոդվածի մեկ այլ մասում:
«Դեռ քիչ է, որ Հայաստանը չի կատարում այդ պահանջները, նա ցանկանում է Լեռնային Ղարաբաղում օդանավակայան բացել, ինչը կարող է խորացնել հակամարտություը», - ասվում է թերթի մեջ: Իսկ այն, որ օդանավակայանը քաղաքացիական է, այլ ոչ թե ռազմական, կրկին լռում են հոդվածում:
Օբյեկտիվության խաբուսիկ տեսանելիությունը պահպանելու համար, մեջբերվում է Հայաստանի պաշտպանության նախարար Սեյրան Օհանյանի հայտարարությունը, որի խոսքով՝ դիվերսանտները (նրանցից մեկը սպանված է, երկուսը՝ ձերբակալված են) կմեղադրվեն սպանության, սպանության փորձի եւ լրտեսության փորձի համար: