Ուկրաինայում Malaysia Airlines-ի ուղեւորատար ինքնաթիռի կործանման միջազգային հետաքննության պատասխանատվությունը ստանձնել են Նիդեռլանդները: Այդ մասին ասվում է Անվտանգության խորհրդի մամուլի ծառայության հայտարարության մեջ:
«Ինտերֆաքսի» փոխանցմամբ, ներկայումս քննիչների միջազգային խումբը բաղկացած է 24 անձանցից: Այժմ Ուկրաինայում աշխատում են Նիդեռլանդների անվտանգության խորհրդի չորս քննիչներ:
Նիդեռլանդների անվտանգության խորհուրդը պատասխանատվություն է կրելու քննիչների աշխատանքի համար, որոնք ներկայացնում են Ուկրաինան, Մալայզիան, Ավստրալիան, Գերմանիան, ԱՄՆ-ը, Մեծ Բրիտանիան, Ռուսաստանը, նաեւ Քաղավիացիայի միջազգային կազմակերպությունը:
Հիշեցնենք, որ «Բոինգ-777» ինքնաթիռը կործանվել էր հուլիսի 17-ին: Զոհվել էր 298 մարդ, մեծ մասը՝ Նիդեռլանդներից:
Զոհերի դիակները տեղափոխող ինքնաթիռները արդեն ժամանել են Նիդեռլանդներ: Էյնդհովենի ռազմակայանում դրանց դիմավորել են թագավոր Վիլլեմ-Ալեքսանդերը, նրա կինը, վարչապետ Մարկ Ռյուտտեն, զոհերի հարազատները:
