Գորիսի Քարահունջ գյուղում հուլիսի 23-ի վաղ առավոտյան տեղի ունեցած սպանության մասին ոստիկանություն հայտնել է հենց սպանողը՝ Ալեքսանդր Հովհաննիսյանը:
Ինչպես տեղեկանում ենք ոստիկանության լրատվական ծառայությունից, հուլիսի 23-ին, ժամը 05.00-ին, ոստիկանության Երեւան քաղաքի վարչության օպերատիվ կառավարման կենտրոնից Գորիսի բաժնում հաղորդում է ստացվել, որ իրենց է զանգահարել Ալեքսանդր Հովհաննիսյանը եւ հայտնել, որ մարդ է սպանել:
Մեկնած օպերատիվ խումբը պարզել է, որ 1966 թ. ծնված Ալեքսանդր Հովհաննիսյանը եւ 1986 թ. ծնված Արթուր Մարտիրոսյանը շինարարական աշխատանքներ են կատարել Երեւան-Մեղրի ճանապարհի 241-րդ կմ-ի 920-րդ Մ աջակողմյան հատվածում գտնվող կիսակառույց երկհարկանի շինությունում եւ բնակվել հարեւանությամբ գտնվող շարժական տնակում:
Նույն օրը, ժամը 02.00-ի սահմաններում, նշված տնակում, վիճաբանության ժամանակ, Ա. Հովհաննիսյանը դիտավորությամբ մետաղական ամրանով հարվածներ է հասցրել Ա. Մարտիրոսյանի գլխի հատվածին`պատճառելով մահ:
Ալեքսանդր Հովհաննիսյանը ձերբակալված է:
Հանցագործության գործիք մետաղական ամրանն առգրավված է:
ՀՀ քրեական օրենսգրքի 104 հոդվածի 1-ին մասի հատկանիշներով հարուցված քրեական գործի նախաքննությունը շարունակվում է:
Ավելի վաղ NEWS.am-ը հայտնել էր, որ Գորիսում տեղի էր ունեցել սպանություն. պահակը շինարարական գործիքով սպանել է բանվորին՝ Կապանի 28-ամյա բնակիչ Արթուր Մարտիրոսյանին:
