Վերնիսաժի կրակոցների գործով կալանավորված Վալերի Հովհաննիսյանը Ռուսաստանում երկու անգամ դատվել է՝ ավազակային հարձակում գործելու ու մարդ սպանելու համար: Այս մասին NEWS.am-ին ասաց ԱԺ ԲՀԿ խմբակցության ատգամավոր Կարո Կարապետյանի, որը փեսան հենց մայիսի 17-ին Վերնիսաժի մոտ կրակել եւ վիրավորել էր 5 քաղաքացու, այդ թվում՝ Վալերի Հովհաննիսյանին:
«Վալերին ռազբոյ է արել Ռուսաստանում, մտել մի տուն եւ տան անդամներին խեղդել, մորթել ու երկու անգամ էլ նստել է սպանություն եւ սպանության փորձ կատարելու համար: Հարցրեք բոլորին, Ախալքալաքում դրա մասին բոլորը գիտեն: Իսկ դեպքի օրն էլ Վալերին ծեծել, ջարդել է Գոռին կնոջ եւ երեխայի ներկայությամբ, հետո էլ հայտարարել, թե գնում եմ՝ զենքը բերեմ, գլխից խփեմ: Էդ մասին բոլորն են ասում, սաղ շենքի ախրանան ցուցմունք է տվել, տեսագրությունները կան: Գոռը չէր կարող դիտավորյալ մարդու վրա կրակեր, ինքը կրթված, իրավաբան տղա է»,- ասաց նա:
«Յուվեցի Կարոն» հերքեց Վալերի Հովհաննիսյանի մոր հայտարարությունը, թե ինքն առաջարկել է նրանց, որ Վալերին ցուցմունք տա, թե Գոռ Առաքելյանն ինքնապաշտպանության նպատակով է կրակել:
«Նման բան չի եղել, ուրեմն իր տղեն երկու անգամ դատված, նարկոման, հանցագործ է: Իրենք չգիտեն, որ մարդուն երեխայի, կնոջ ներկայությամբ չեն ծեծում, ջարդում: Կարող ա՝ իմ շողքից են հուշտ լինում, կարող ա՝ իմ անունից են հուշտ լինում: Ինքն էլ աղջիկ ունի, ի՞նչ կլիներ, եթե իր աղջկա ներկայությամբ ծեծեն իր ամուսնուն»,- ավելացրեց նա:
Պատգամավորի պնդմամբ՝ Վալերի Հովհաննիսյանի հայրն ու հորեղբոր որդին են Գոռ Առաքելյանի հարազատներին խնդրել, որ հանդիպում կազմակերպվի կողմերի միջեւ, սակայն ինքը չի համաձայնվել եւ երբեք չի հանդիպել նրանց հետ:
NEWS.am-ի հարցին, թե ԲՀԿ-ական պատգամավորը փորձում է օգնել իր փեսային, վերջինս պատասխանեց, որ «ինչպե՞ս կարող է չօգնել, չխառնվել»:
Հիշեցնենք, որ ըստ նախնական վարկածի՝ Ներսես Մելքոնյանն ու նրա ընկեր Վալերի Հովհաննիսյանը, մայիսի 17-ին՝ ժամը 13:30-ի սահմանում, «Վերնիսաժի» մոտ վեճի են բռնվել Գոռ Առաքելյանի հետ եւ բռնություն կիրառել նրա նկատմամբ, հնչել էին կրակոցներ, 5 մարդ վիրավորվել էր, այդ թվում՝ Ներսես Մելքոնյանն ու նրա ընկեր Վալերի Հովհաննիսյանը, նաեւ պատահական անցորդներ: ԱԺ ԲՀԿ-ական պատգամավոր Կարո Կարապետյանի փեսան՝ Գոռ Առաքելյանը, մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու համար եւ երկամսյա նախնական կալանք է սահմանվել։ Հունիսի 9-ին կալանավորվել էր նաեւ Ներսես Մելքոնյանը, նրան մեղադրանք է առաջադրվել խուլիգանություն կատարելու համար:
Հիշեցնենք, որ Վալերի Հովհաննիսյանին մեղադրանք առաջադրելուց հետո խափանման միջոց է ընտրվել կալանավորումը, և նրան հիվանդանոցից ծանր առողջական վիճակում տեղափոխել են «Դատապարտյալների հիվանդանոց» ՔԿՀ:
