Տեղեկությունները պահպանելու ժամանակակից մեթոդների մեջ Միչիգանի համալսարանի գիտնականների առաջարկած նոր հայեցակարգը, թերեւս, ամենից արտասովորն է: Հետազոտողները ենթադրում են, որ ապագայի համակարգիչներում տեղադրված են լինելու հեղուկ բիթեր. տվյալները գրանցվում եւ պահվում են հեղուկի մեջ կախված չափազանց փոքր մասնիկներում:
Մեթոդիկայի հեղինակներն այն համեմատում են Ռուբիկ-խորանարդիկի հետ: Շերոն Գլոտցերի եւ նրա գործընկերների պատկերացմամբ, այդ խորանարդիկներից յուրաքանչյուրը կարող է ինֆորմիացիայի միավոր լինել: Եթե համակարգում կենտրոնական ոլորտը մյուսներից փոքր է, ապա դրան շրջապատող մասնիկները որսալու են միմյանց եւ որոշակի վիճակում են պահելու:
Ըստ Vesti.ru-ի, ապագա փորձերի ժամանակ հետազոտողներն օգտագործելու են գել, որից կենտրոնական ոլորտն են ստեղծելու: Ի տարբերություն սովորական հեղուկի, գելը կարող է ուռչել եւ կրկին սեղմվել, ինչը համակարգի կառավարումն ավելի պարզ կդարձնի:
Մասնագետները նշում են, որ այս հայեցակարգը չի ենթադրում տվյալների պահպանման ավանդական մեթոդների փոխարինում: Նրանք առաջարկում են հեղուկ բիթերն օգտագործել կենսաբանական համակարգերում համակարգչային գործողություններ կատարելու համար: Օրինակ՝ ներդրվող մինի-սարքավորումների օգնությամբ հիվանդի վիճակի դիտարկում անցկացնելիս:
