Դժբախտ պատահար է տեղի ունեցել Գյումրի քաղաքի Երեւանյան խճուղում. հուլիսի 24-ին, ժամը մոտ 22։00-ին մի երիտասարդ ընկել է Երեւան-Գյումրի գնացքի տակ ընկել ու մահացել:
Գյումրիում NEWS.am-ի թղթակիցը հաղորդում է, որ տեղում աշխատող փրկարարների խոսքով՝ երիտասարդը մոտ 20-25 տարեկան էր։
Հարվածից հետո գնացքի մեքենավարը մոտ 200 մետր անցնելուց հետո է միայն կարողացել արգելակել գնացքը, երիտասարդի մարմինը մասնատվել է։
Այս պահին դեպքի վայրում աշխատում են Շիրակի մարզի փրկարարական վարչությունը, Շիրակի մարզի Ախուրյանի քննչական բաժնի աշխատակիցները, որոնք փորձում են պարզել մահացած երիտասարդի ինքնությունը։
Դեպքին ականատեսը NEWS.am-ի թղթակցին պատմեց, որ այդ երիտասարդը գնացքի ռելսերի վրայով քայլելիս է եղել՝ ականջակալները ականջներին: Նա չի լսել գնացքի ազդանշանը: Նրա գնահատմամբ՝ գնացքը թույլատրելի արագությամբ էր ընթանում՝ մոտ 60 կմ/ժամ: