Վրաստանի նախկին նախագահ Միխայիլ Սահակաշվիլին հրապարակավ քննադատել է վարչապետ Իրակլի Ղարիբաշվիլիին՝ Ռուսաստանի հետ համագործակցության, ինչպես նաեւ ն Ուկրաինայի հարցում դիրքորոշման կապակցությամբ:
Իրակլի Ղարիբաշվիլին նախօրեին հայտարարել էր, որ «Ռուսաստանի հետ ամեն երկիր իր հարաբերություններն ունի» եւ առաջարկել էր Վրաստանից օրինակ վերցնել, ով լավ հարաբերությունների մեջ է Ռուսաստանի հետ եւ շարունակում է եվրոպական կուրսը՝ ձգտելով ԵՄ:
Նա Ռուսաստանի հանդեպ Վրաստանի քաղաքականությունն անվանել էր «խելամիտ եւ հաշվենկատ»:
«Ղարիբաշվիլի հայտարարությունը, որտեղ նա փաստացի ասաց, որ Վրաստանը չի կարող սատարել Ուկրաինային եւ պետք է կենտրոնանա ՌԴ-ի հետ հարաբերությունների բարելավման վրա, արմատապես փոխում է երկրիս ռազմավարական ուղղությունը», - Facebook-ի էջում գրել է Սահակաշվիլին: Նա նաեւ հիշեցրել է, որ Վրաստանը տարիներով պայքարում էր կայսերապետական Ռուսաստանի դեմ:
«Իսկ հիմա, երբ ամբողջ երկիրը սատարում է ուկրաինացի եղբայրների ու քույրերի ազատության համար մղվող անձնուրաց պայքարին, վրացական կառավարությունը երես է թեքում Ուկրաինայից: Սա նվաստացում է Ռուսաստանի բարեհաճությունը ստանալու համար եւ խայտառակություն՝ վրաց ժողովրդի առաջ», ասված է Սահակաշվիլիի մեկնաբանությունում: