Եթե հանկարծ անմարդաբնակ կղզի ընկնեք, այդ դեռեւս սմարթֆոնից հրաժարվելու առիթ չէ, հատկապես, եթե սարք հավաքեք, որը հեռախոսին էներգիա կհաղորդի կարտոֆիլի եւ խնձորի միջոցով: Նման սարք ստեղծելու գաղափարը ծնվել է լոնդոնյան նկարիչ Կալեբ Չարլենդի մոտ:
Չարլենդն իր հայտնագործությունը ներկայացրել է հանրությանը՝ հետաքրքրված լոնդոնցիներին թույլ տալով իրենց հեռախոսները լիցքավորել 800 խնձորից եւ կարտոֆիլից հավաքված եւ պղնձե մետաղալարով միացված արտասովոր սարքով: Այս մասին գրում է Vesti.ru-ն:
Սարքի հոսանքի ուժը կազմում է 20 միլիամպեր եւ շուրջ 6 վոլտ: «Այդ կերպ էլեկտրականություն ստանալու անհավանական պարզությունը միշտ գրավել է ինձ: Շատերը, ոչ միայն ես, դեռեւս դպրոցում փորձեր են կատարել՝ մրգերից էներգիա ստանալով»,- հիշում է Չարլենդը՝ հավելելով, որ պարզապես դպրոցական փորձը կրկնել է ավելի լայն մասշտաբով:
Նկարիչը կարողացել է իր արտասովոր նախագծի համար ֆինանսավորում ստանալ Microsoft-ից: Հավանաբար, այդ պատճառով էլ Չարլենդը բոլոր լուսանկարներում խնձորային էներգիայով լիցքավորում է հենց Lumia սմարթֆոնը: