Կանադայի վարչապետը չի պատկերացնում, թե ինչ պայմաններում Ռուսաստանը կարող է վերադառնել «մեծ յոթնյակ». ակումբ, որը միավորում է աշխարհի՝ համեմատաբար զարգացած արդյունաբերությամբ երկրներին: Այս մասին Սթիվեն Հարփերը գրել է Globe and Mail-ում տպագրված հեղինակային հոդվածում:
Ուկրաինական ճգնաժամի զարգացման լույսի ներքո վարչապետը նշել է. «Իր գործողություններում Ռուսաստանը ցուցադրեց, որ չի կիսում այդ հանրության երկրների արժեքները, որոնք հավատարիմ են ժողովրդավարությանը, միջազգային անվտանգությանն ու իրավունքի գերակայությանը»:
Reuters գործակալությունը հիշեցնում է, որ 2006 թվականին Կանադայում աջ պահպանողական Սթիվեն Հարփերի իշխանության գալուց հետո Օտտավայի եւ Մոսկվայի հարաբերությունները հազվադեպ կարելի է բնորոշել ավելի լավ, քան «սառը»: Ուկրաինական ճգնաժամը սկսվելուց ի վեր Հարփերը կոշտ դիրք է գրավել Ռուսաստանի հանդեպ՝ պահանջելով նրան բացառել «Մեծ ութնյակից»:
«Նախագահ Պուտինի հետ Ռուսաստանի ներսում ուժեղացել է բռնակալությունը, իսկ նրա արտաքին քաղաքականությունը դարձել է վտանգավոր ագրեսիվ: Հիմա այդ ռեժիմի վրա դիվանագիտական եւ տնտեսական ճնշումները թուլացնելու ժամանակը չէ»,- Կանադայի վարչապետի տեսակետն է ներկայացրել Deutsche Welle-ի ռուսական ծառայությունը: