«Ռոսնեֆթ»-ը Հայաստանում հնարավոր ներդրումների տեսության շրջանակում հետաքրքրվել է Երեւանի ՋԷԿ-ի ջերմային էներգիայի հնարավոր սակագներով: Այս մասին NEWS.am-ի թղթակցի հետ զրույցում տեղեկացրեց «Երեւան ՋԷԿ» ՊՓԲԸ-ի գլխավոր տնօրեն Հովակիմ Հովհաննիսյանը:
«Նաիրիտ»-ի վերաբերյալ «Ռոսնեֆթ»-ի եւ մեր կառավարության բանակցությունների մասին ոչինչ ասել չեմ կարող, քանի որ դրանց չեմ մասնակցել: Բայց կարող եմ ասել, որ «Ռոսնեֆթ»-ը հետաքրքրված է մեր ջերմային սակագներով (որն անհրաժեշտ է քիմիական գործարանի աշխատանքի համար - խմբ.): Մենք քննարկել ենք հնարավոր տարբերակներն ու առաջարկներ արել: Չգիտեմ՝ ինչ կորոշեն նրանք, քանի որ նրանց առջեւ դեռեւս գործարանի համար վայր եւ արտադրության տեխնոլոգիաներ ընտրելու խնդիր է դրված»,- ասաց Հովհաննիսյանը:
Նշենք, որ մինչեւ 2010 թվականը Երեւանի ՋԷԿ-ի ջերմային էներգիայի հիմնական սպառողը «Նաիրիտ գործարան» ՓԲԸ-ն էր (դեռեւս Խորհրդային Հայաստանի խոշորագույն քիմիական գործարանը): Քանի որ գործարանը չի աշխատում, ՋԷԿ-ի նոր էներգաբլոկը գործում է կոնդենսացիոն ռեժիմով (էլեկտրաէներգիա է թողարկում՝ առանց ջերության):
«Պոտենցիալ այլ սպառողներ էլ կան, դիմել են մեզ: Բայց նրանց այնպիսի փոքր ծավալներ են անհրաժեշտ, ասենք՝ ժամում 1 տոննա, որ նրանց համար գոլորշու արձակումը բացելը պարզապես անհնար է»,- ամփոփեց Հովակիմ Հովհաննիսյանը:
Հիշեցնենք, որ շուրջ 2 տարի «Ռոսնեֆթ»-ը հետաքրքրվում է Հայաստանում քիմիական արտադրության բացելու հնարավորություններով: Որպես ներդրման գլխավոր օբյեկտ Հայաստանի կառավարությունը համարում է «Նաիրիտ» գործարանը: Մարտին «Ռոսնեֆթ ՆԸ» ԲԲԸ-ն NEWS.am-ին տեղեկացրել էր, որ իտալական «Pirelli» կոնցեռնի հետ նախնական տեխնիկա-տնտեսական հիմնավորումն են պատրաստում՝ Հայաստանում բութադիենստիրոլային կաուչուկի արտադրության վերաբերյալ: