Թուրքիայի տարածքում գտնվող եւ մինչ այժմ այցելությունների համար փակ համարվող հայտնի հայկական եկեղեցիներից եւս մեկը հայտնվել է NEWS.am-ի ֆոտոխցիկի առաջ: (ֆոտոռեպորտաժ)
Երկար տարիներ թուրքական զորամասի տարածքում գտնվող Վանի Բաշքալեի (Աղբակի) շրջանի Սուրբ Բարդուղեմեոս եկեղեցին մասնակիորեն ազատվել է գերությունից՝ զորամասի տեղափոխման հետեւանքով:
NEWS.am-ի ֆոտոխցիկը կարողացել է մուտք գործել զորամասի տարածք եւ ֆիքսել Սուրբ Բարդուղեմեոսի գեղեցկությունը:
Ցավոք, եկեղեցին կիսավեր վիճակում էր, սակայն նրա գեղեցկությունը դրանից չէր խամրել: Հայտնի չէ, թե ինչ վիճակում կլիներ եկեղեցին, եթե չլիներ զորամասի տարածքում եւ ենթարկվեր հայերի գանձերը փնտրող սրբապիղծ գանձագողերի հարձակումներին:
Ըստ ավանդության եկեղեցին հիմնադրել է հայոց Սանատրուկ թագավորը Սուրբ Բարդուղեմեոս առաքյալի գերեզմանի վրա: Միջնադարում այն եղել է Աղբակ գավառի առաջնորդանիստ վանքը եւ կարեւոր ուխտատեղի:
Եկեղեցուն արեւմուտքից կից գավթի շքամուտքին քանդակված են գահին բազմած Հայր Աստված, Քրիստոս և աղավնակերպ Սուրբ Հոգին: Սուրբ Երրորդության այս պատկերաքանդակը տվյալ թեմայով լավագույն ստեղծագործություններից է: Ներկայում այս պատկերաքանդակը կիսով չափ ավերված է:
Վանի նահանգապետը ամիսներ առաջ այցելել է Սուրբ Բարդուղեմեոս եւ հայտել, որ եկեղեցին անպայման վերանորոգվելու է եւ բացվելու է տուրիզմի համար: