Ուկրաինայի շուրջ հակամարտության սրումը կարող է բացասական հետեւանքների հանգեցնել ողջ աշխարհում: Այդ մասին նշվում է նոր զեկույցում, որը հուլիսի 29-ին տարածել է Արժույթի միջազգայի հիմնադրամը, հաղորդում է ԻՏԱՌ-ՏԱՍՍ-ը:
Զեկույցում նշվում է, որ Ռուսաստանից Եվրոպա բնական գազի մատակարարման էական խափանումները լուրջ վտանգ են ներկայացնում, քանի որ Ռուսաստանն ապահովում է գազի եվրոպական պահանջարկի մեկ երրորդը: Հեղինակի կարծիքով՝ «կենտրոնական, արեւելյան եւ հարավարեւելյան Եվրոպայի երկրների մեծամասնությունը կախված է ռուսական մատակարարումից 40-100 տոկոսով»: ՌԴ գազից են կախված Ավստրիան, Ֆինլյանդիան եւ Գերմանիան:
ԱՄՀ-ում համարում են, որ «նավթային շուկաներում բացասական երեւույթները սահմանափակ տեսք ունեն»: «Չնայած որ Ռուսաստանին բաժին է հասնում աշխարհում նավթի արդյունահանման 10 տոկոսը, միեւնույն նաթվի գինը կայուն է մնում: Սակայն այն կարող է կտրուկ աճել աշխարհաքաղաքական խնդիրների ֆոնի վրա»,- նշվում է զեկույցում:
Զեկույցում նախազգուշացնում են, որ «տեղական բացասական հետեւանքները» կարող են տարածվել առանձին երկրների վրա: Մասնավորապես նշվում է, որ ՌԴ հարեւան շատ երկրներում, ներառյալ Բալթյան պետությունները, Բելառուսը, Մոլդովան, Թուրքմենստանը, Ուկրաինան եւ Ուզբեկստանը, Ռուսաստան արտահանումը գերազանցում է ՀՆԱ ընդհանուր ծավալի 5 տոկոսը:
