Հայաստանի եւ Ադրբեջանի նախագահների հնարավոր հանդիպման միակ նպատակը բանակցային գործընթացի շարունակությունն է, ինչը նպաստում է հրադադարի փխրուն ռեժիմի պահպանմանը: Այսօր՝ հուլիսի 30-ին, նման կարծիք հայտնեց Կովկասի ինստիտուտի փոխտնօրեն Սերգեյ Մինասյանը:
«Այդ հանդիպումը այլ նպատակներ չունի եւ չի էլ կարող ունենալ, քանի որ մոտ ապագայում, եթե ոչ մի ֆորս-մաժորային հանգամանքներ չլինեն, երկու կողմերի դիրքորոշումներում էական փոփոխություններ չեն սպասվում», - հավելեց քաղաքագետը:
Բացի այդ, Մինասյանը ուշադրություն հրավիրեց այն հանգամանքին, որ արդեն բացահայտ թշնամական հարաբերությունների մեջ գտնվող Ռուսաստանն ու Արեւմուտքը, այդուհանդերձ, պահպանում են ԵԱՀԿ Մինսկի խմբի ձեւաչափը: Պատճառն այն է, որ որ ինչպես Ռուսաստանում, այնպես էլ Վաշինգթոնում, Փարիզում եւ Բրյուսելում ստատուս-քվոյի փոփոխությունը ոչ մի լավ բանի չի հանգեցնի: