ՀՀ Էներգետիկայի և բնական պաշարների նախարար Երվանդ Զախարյանն այսօր՝ հուլիսի 31-ին բարկացրեց կառավարության առջեւ իրեն մոտեցած տիկին Արմենուհուն՝ նրան առաջարկելով «մի կերպ» վճարել օգոստոսի մեկից բարձրացող էլեկտրաէներգիայի սակագինը: Տիկին Արմենուհին վրդովված հարցրեց նախարարին, թե օգոստոսի 1-ից թանկացող էլեկտրաէներգիայի համար ինչպես են վճարելու իր նման սոցիալապես անապահով քաղաքացիները։
«Վաղվանից, որ հոսանքը թանկանում ա, ո՞նց ենք վճարելու: Իմ լույսը դուք եք մուծելու: Բա ճար չունեմ, 27 հազար թոշակ եմ ստանում, էդ թոշակից հիմա ես ո՞նց եմ մուծում անելու»,-նախարարի հետեւից քայլելով՝ ասաց կինը:
Երվանդ Զախարյանը կնոջը կարճ պատասխանեց՝ «մի կերպ», ինչն ավելի վրդովեցրեց նրան.
«Ո՞նց թե մի կերպ: Շոր էլ չունենք, որ ծախենք: Ոչ շոր, ոչ կոշիկ: Մի կերպ ի՞նչ ա նշանակում։ Մի կերպդ թաղեմ»,- բարկացավ Արմենուհի Մելքոնյանը:
Հիշեցնենք, որ հուլիսի 1-ին Հանրային ծառայությունները կարգավորող հանձնաժողովը որոշում ընդունեց, ըստ որի այս տարվա օգոստոսի 1-ից Հայաստանում սպառողների համար էլեկտրաէներգիան կթանկանա 9,9 տոկոսով՝ 3,85 դրամով: Ցերեկային սակագինը բնակիչների համար 38 դրամից կդառնա 41,85 դրամ մեկ կվ/ժամ-ի դիմաց, գիշերային սակագինը 28 դրամից կդառնա 31,85 դրամ: Գիշերային սակագները գործում են ժամը 22.00-ից մինչեւ առավոտյան ժամը 06.00-ը (մարտի վերջին կիրակիից մինչեւ հոկտեմբերի վերջին կիրակին), եւ ժամը 23.00-ից մինչեւ ժամը 07.00-ն (հոկտեմբերի վերջին կիրակիից մինչեւ մարտի վերջին կիրակին): Հանրային ծառայությունները կարգավորող հանձնաժողովը թանկացումը պատճառաբանում է «Էլեկտրական ցանցեր» ընկերությունում առաջացած ֆինանսական ճեղքվածքով:
