Լեռնային Ղարաբաղի ԱԳՆ կրկին հիշեցնում է հրադադարի ռեժիմի ամրապնդման վերաբերյալ ավելի վաղ ներկայացրած առաջարկությունների մասին:
Ինչպես ավելի վաղ էր հաղորդվել, ԵԱՀԿ Մինսկի խմբի ամերիկյան համանախագահ Ջեյմս Ուորլիքը Twitter-ում գրառում էր կատարել՝ անհանգստություն հայտնելով հրադադարի ռեժիմի խախտման դեպքերի հաճախացման առիթով:
Այդ կապակցությամբ ԼՂՀ ԱԳՆ-ը հիշեցնում է միջնորդի՝ հրադադարի ռեժիմի ամրապնդմանն աջակցելուն ուղղված նախկինում առաջ քաշած առաջարկությունների մասին:
Մասնավորապես, 2001թ. Լեռնային Ղարաբաղի հանրապետության ղեկավարությունը, ԵԱՀԿ Մինսկի խմբի համանախագանների միջնորդությամբ, ադրբեջանական կողմին է փոխանցել վստահության ամրապնդման միջոցառումների փաթեթը, որը ներառում է հակամարտող կողմերի համագործակցություն բոլոր ուղղություններով, այդ թվում՝ ռազմական անվտանգության ոլորտում: Առաջարկվել էր կողմերի բարձրագույն ղեկավարության կողմից հրադադարի գործող ռեժիմի պահպանմանը հավատարիմ մնալու, հակամարտությունը ԵԱՀԿ հովանու ներքո բացառապես խաղաղ ճանապարհով կարգավորելու հատատում, ինչպես նաեւ կողմերի եւ/կամ նրանց օպերատիվ շտաբների միջեւ ուղիղ գծերի սահմանում, այդ տվում՝ տեղային մակարդակում:
2004 թ. Լեռնային Ղարաբաղի Հանրապետությունն առաջարկել է հրադադարի ռեժիմի մշտական դիտարկում սահմանել ԵԱՀԿ Գործող նախագահի անձնական ներկայացուցչի գրասենյակի անձնակազմի ընդլայնման միջոցով։
2006 թ. Լեռնային Ղարաբաղի Հանրապետությունը հանդես է եկել ԵԱՀԿ հովանու ներքո Լեռնային Ղարաբաղի Հանրապետության, Հայաստանի Հանրապետության և Ադրբեջանի Հանրապետության միջև ձեռք բերված և 1995 թ. փետրվարի 6-ին ուժի մեջ մտած համաձայնագրում ամրագրված հրադադարի ռեժիմի ամրապնդման պարտավորությունները երեք կողմերից փոխադարձաբար հաստատելու վերաբերյալ առաջարկով:
2012 թ. Լեռնային Ղարաբաղի Հանրապետությունն առաջարկել է որպես առաջին քայլ կրոնական տոների ընթացքում (ինչպիսինն է Զատիկը և Նովրուզը) շփման գծից հետ քաշել դիպուկահարներին և ձեռնպահ մնալ ցանկացած սադրիչ գործողություններից։
Դժբախտաբար, Լեռնային Ղարաբաղի Հանրապետության նախաձեռնություններից ոչ մեկը, չնայած դրանց նկատմամբ միջնորդների աջակցությանը և միջազգային հանրության կոչերին, չի ընդունվել ադրբեջանական կողմից:
