Թուրքիայի վարչապետ Ռեջեփ Թայիփ Էրդողանի կողմից հայերին հասցեին արված վիրավորանքից հետո հայտարարություն է արել ստամբուլահայ հայտնի լրագրողներից Հայկո Բաղդատը։
Թուրքական Cumhuriyet պարբերականի փոխանցմամբ՝ ստամբուլահայ լրագրող Հայկո Բաղդատը, անդրադառնալով Թուրքիայի վարչապետ Ռեջեփ Թայիփ Էրդողանի սկանդալային հայտարարությանը՝ շեշտել է, թե բոլորովին հաճելի չէ, երբ վարչապետը ազգային փոքրամասնությունների մասին խոսելիս օգտագործում է «կեղտոտ» բառը։
«Ինչ նպատակով էլ, որ ասել է այդ ամենը վարչապետը, միեւնույնն է, նա պետք է հայերից, ալեւիներից, զազաներից եւ վրացիներից ներողություն խնդրի։ Ես այդպես եմ մտածում։ Իրական խաղաղությունը սա է, իրական ցավակցական ուղերձը սա է»,-ասել է Հայկո Բաղդատը։
Նշենք, որ Թուրքիայի վարչապետ, նախագահի թեկնածու Ռեջեփ Թայիփ Էրդողանը թուրքական Star TV եւ NTV հեռուստաընկերությունների համատեղ եթերում պատասխանելով հաղորդավարի հարցերին, անդրադարձել է նաեւ ժողովրդի կողմից քննարկվող իր արմատների հարցին: «Իմ արմատները Ռիզեից են: Ինձ ասում էին, թե վրացի եմ, ավելին, մեկը կանգնեց ավելի կեղտոտ բան ասաց՝ պնդելով, թե ես հայ եմ»,-ասել էր Ռեջեփ Թայիփ Էրդողանը: Էրդողանի այս խոսքերը մեծ արձագանքն են գտել թուրքական մամուլում եւ սոցկայքերում։
