Թուրքիայի գլխավոր ընդդիմադիր «Ժողովրդա-հանրապետական» (CHP) կուսակցության Քոջաելիից ընտրված պատգամավոր Հուրշիթ Գյունեշը հայերին վիրավորելու համար դատական հայց է ներկայացրել երկրի վարչապետ, իշխող կուսակցության կողմից նախագահի թեկնածու առաջադրված Ռեջեփ Թայիփ Էրդողանի դեմ։

Թուրքական Zaman պարբերականի փոխանցմամբ՝ CHP-ի պատգամավոր Հուրշիթ Գյունեշը նշել է, թե հայ ժողովրդին վիրավորելու համար դատական հայց է ներկայացրել վարչապետ Էրդողանի դեմ՝ հայերի նկատմամբ թշնամանք ու ատելություն հրահրելու, հայ ժողովրդին ստորացնելու մեղադրանքով։

Հուրշիթ Հյունեշը հիշեցրել է, որ վարչապետ Ռեջեփ Թայիփ Էրդողանն իր հարցազրույցի ժամանակ այնպես է խոսել հայերի մասին, կարծես հայ լինելը հանցանք է։ «Վարչապետը հանցանք է գործել՝ ստորացնելով հայ հասարակությանը։  Դա թշնամական պահվածք է եւ Թուրքիայի քրեական օրենսգրքով հանցանք է համարվում։ Նրա ասած արտահայտությունը տեղավորվում է Թուրքիայի քրեական օրենսգրքի 216-րդ հոդվածի հատկանիշներին՝ ազգային հողի վրա հանցանքներ։ Նրա հայտարարությունը խախտում է նաեւ Թուրքիայի Սահմանադրությանը 10-րդ հոդվածը եւ Մարդու իրավունքների կոնվենցիան»,-ասել է թուրք պատգամավորը՝ շեշտելով, որ Էրդողանի դեմ դատական հայց է ներկայացրել Անկարայի գլխավոր դատախազությունում։

Նշենք, որ Թուրքիայի վարչապետ, նախագահի թեկնածու Ռեջեփ Թայիփ Էրդողանը թուրքական Star TV եւ NTV հեռուստաընկերությունների համատեղ եթերում պատասխանելով հաղորդավարի հարցերին, անդրադարձել է նաեւ ժողովրդի կողմից քննարկվող իր արմատների հարցին: «Իմ արմատները Ռիզեից են: Ինձ ասում էին, թե վրացի եմ, ավելին, մեկը կանգնեց ավելի կեղտոտ բան ասաց՝ պնդելով, թե ես հայ եմ»,-ասել էր Ռեջեփ Թայիփ Էրդողանը: Էրդողանի այս խոսքերը մեծ արձագանքն են գտել թուրքական մամուլում եւ սոցկայքերում։