Այժմ Հյուսիսային Իրաքի տարածքում եզդի ժողովրդի նկատմամբ 74-րդ ցեղասպանությունն է իրականացվում: Այս մասին օգոստոսի 19-ի մամուլի ասուլիսում հայտարարել է Հայաստանի եզդիների միության նախագահ Ազիզ Թամոյանը:
Ըստ նրա՝ Իրաքում եզդիների թիվը 1 մլն 300 հազար է: «Իսլամիստների ներկայիս նպատակը եզդիներին երկրի երեսից ջնջելն է: Օգոստոսի 2-ին հարձակում էին գործել «Եզդիստանի» տարածքի վրա: Դաժանաբար սպանվել էին կանայք, երեխաներ, տարեցներ: Այդ գիշատիչները, մարդակերները, որոնք մարդ են սպանում միայն նրա համար, որ մահմեդական չեն, Երկրի վրա ապրելու իրավունք չունեն», - վրդովված հայտարարել է Եզդիների միության նախագահը:
Սինջարում, որը եզդիների մայրաքաղաքն է համարվում, իսլամիստների դեմ այժմ պայքարում են շուրջ 1500 զինված եզդիներ: Եզդիները, հիշեցրել է նա, լքել էին 70 եզդիական բնակավայրեր ու փախել Սինջարի լեռներ: Ազիզ Թամոյանը նաեւ զարմանք է հայտնել ԱՄՆ-ի պահվածքի կապակցությամբ. «Եթե ԱՄՆ-ն լրջորեն ցանկանար, վաղուց լուծած կլիներ այս հարցը»:
