Լեռնային Ղարաբաղի Հանրապետության համար լավագույն խաղաղապահները հենց ԼՂՀ-ի Զինված ուժերն են: Այս մասին լրագրողների հետ զրույցում հայտարարել է ԼՂՀ պաշտպանության նախարար, պաշտպանության բանակի հրամանատար Մովսես Հակոբյանը՝ պատասխանելով հարցին, թե ինչպես է վերաբերվում Ղարաբաղի տարածք խաղաղապահներ մտցնելու գաղափարին: «Այս տարածաշրջանում մեզանից լավ խաղաղապահ չկա», - նշել է նախարարը:
Անդրադառնալով Ադրբեջանին Ռուսաստանի զենք վաճառելուն՝ Հակոբյանն ասել է. «Այն, որ Ադրբեջանը զենք է գնում, շատ վատ է, սակայն դա մեզ չի վախեցնում»: Ըստ նրա՝ վերջին դիվերսիոն գործողությունների ժամանակ ադրբեջանցի զինծառայողները հայկական կողմին նվեր են թողել մի քանի տեսակի զենք, որը ԼՂՀ-ի բանակը չուներ: «Լավ սպառազինությունը կարեւոր է, սակայն որոշիչ չէ: Բանակում օպերատիվության արվեստ գոյություն ունի, կարեւոր է կարողանալ հմտորեն գործածել ունեցած զենքը»:
