Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչությունը՝ որպես լիազոր մարմին, պաշտոնապես գործունեություն իրականացնելու թույլտվություն հավաստող փաստաթուղթ /սերտիֆիկատ/ է շնորհել «Զվարթնոց» ավիաօդերեւութաբանական կենտրոնին:
Ինչպես տեղեկանում ենք վարչության մամուլի ծառայությունից, փաստաթղթով հավաստիացվում է, որ «Զվարթնոց» ավիաօդերեւութաբանական կենտրոնի մասնագիտական եւ տեխնիկական պատրաստականությունը համապատասխանում է Հայաստանի Հանրապետության օրենսդրությամբ եւ «Միջազգային քաղաքացիական ավիացիայի մասին» կոնվենցիայով սահմանված չափանիշներին եւ կարող է իրականացնել աէրոնավիգացիոն օդերեւութաբանական սպասարկում: Նշենք, որ այս սերտիֆիկատը լիովին համապատասխանում է Եվրամիության կողմից առաջադրված EU 1035/ 2011 կանոնակարգի պահաջներին: Կենտրոնը 24 ժամյա տեղեկատվություն է տրամադրում Երեւանի «Զվարթնոց» եւ Գյումրիի «Շիրակ» օդանավակայանների թռիչքային անձնակազմերին: Ընկերությունը վերազինման փուլում է եւ նախատեսում է ձեռք բերել նորագույն սարքեր ու սարքավորումներ: