NASA-ն տիեզերանավի կառուցման համար մտադիր է բազմամիլիոնանոց գործարք կնքել ամերիկյան ընկերություններից մեկի հետ աստղագնացներին միջազգային տիեզերակայան հասցնելու համար: Նոր նավը կփոխարինի «Սոյուզին», հաղորդում է Lenta.ru-ն՝ վկայակոչելով The Washington Post թերթին:
Պայմանագիրը ԱՄՆ-ին թույլ կտա երկար տարիների ընթացքում առաջին անգամ ազատվել «Ռոսկոսմոսի» կախվածությունից, որին NASA-ն «Սոյուզի» յուրաքանչյուր տեղի համար վճարում է 70 մլն դոլար:
Պարբերականի տվյալներով՝ SpaceX-ը եւ Boeing-ը, աստղագնացներին ուղեծիր հասցնելու համար պատիճ են մշակում: Իր հերթին Sierra Nevada-ն ստեղծում է Dream Chaser «տիեզերական ինքնաթիռ»:
Ի սզբանե նախագծի շրջանակներում առաջին մեկնարկը ծրագրվել էր 2015թ.-ին, սակայն ֆինանսավորման հետ կապված խնդիրների պատճառով հետաձգվել է եւս 2 տարով: NASA-ն հույս ունի, որ նոր տիեզերանավը տարեկան երկու անգամ կթռչի միջազգային տիզերակայան: Նախագիծը նաեւ մասնավոր հրթիռատիեզերական ոլորտի զարգացման համար ազդակ կլինի:
