Ռուսաստանը ռազմական ուղիղ ներխուժում է իրականացրել Ուկրաինայի տարածք՝ փորձելով դա քողարկել հումանիտար բեռանն ուղեկցող շարասյան անվան տակ: Այս մասին հայտարարել է Ուկրաինայի անվտանգության ծառայության պետ Վալենտին Նալիվայչենկոն, փոխանցում է ՈՒՆԻԱՆ-ը:
Նալիվայչենկոն նշել է, որ ըստ ՈՒԱԾ-ի, Ռուսաստանի այսպես կոչված հումանիտար շարասյունը երեք նպատակ ունի: Առաջին՝ սպիտակ ներկված ռազմական կամազների օգտագործումը հրետանային սպառազինություն տեղափոխելու համար, երկրորդ՝ հանցախմբերի համար զենք եւ զինամթերքի տեղափոխումը եւ երրորդ՝ կարեւորագույնը, հանցագործությունները թաքցնելը, սպանվածների մարմինները հարազատներից եւ Ուկրաինայի իշխանություններից թաքցնելը, որպեսզի զոհվածների հարազատները Ռուսաստանում չիմանան՝ որտեղ են մահացել իրենց բարեկամները, նշել է նա:
Բացի դրանից, Նալիվայչենկոն նշել է, որ Ուկրաինայի սահմանն են անցել արդեն 34 բեռնատար, իսկ որպես վարորդ հանդես եկող զինվորական անձնակազմով 200-ից ավելի մեքենա կանգնած են անմիջապես սահմանին:
Ըստ նրա՝ այս բոլոր մեքենաների տեղաշարժը ղեկավարում է ռուս գեներալը: