Ամերիկյան գիտնականները ներկայացրել են Անտարկտիդայի արեւմուտքում գտնվող Ուիլլանս լճի սառույցների տակ բնակվող միկրոօրգանիզմների առաջին մանրամասն ուսումնասիրությունը: Նրա ջրերում 800 մետր խորությամբ բնակվում են ավելի քան 3.900 տեսակի միկրոօրգանիզմներ, որոնց մեծ մասը միաբջիջ արքեաներ են:
Ամերիկյան Մոնտանա նահանգի համալսարանից Ջոն Պրիսկուն այս բացահայտումը կանխատեսել էր դեռեւս 10 տարի առաջ, եւ ահա այն հաստատվել է:
Արքեաների մի մասն ապրում է ամոնիումի քիմիական միացությունների էներգիայի, մյուսները՝ մեթանից առաջացող ածխածնի էներգիայի հաշվին: Իսկ ամոնիումն ու մեթանը, ըստ մասնագետների, ստացվում են կենդանի էակների մնացորդների քայքայման հետեւանքով, որոնք բնակվել են Անտարկտիդայում՝ մինչեւ այն սառույցով պատվելը: Հնարավոր է, որ էներգիայի լրացուցիչ աղբյուր է դառնում հալվող սառույցը: