Ռուսաստանի նախագահ Վլադիմիր Պուտինն ու Գերմանիայի կանցլեր Անգելա Մերկելն օգոստոսի 22-ին գերմանական կողմի նախաձեռնած հերթական հեռախոսազրույցի ընթացքում կարծիքներ են փոխանակել Ուկրաինայում տիրող իրավիճակի շուրջ: Այս մասին տեղեկացնում է Կրեմլի պաշտոնական կայքը:
Օգոստոսի 23-ին Գերմանիայի կանցլերի՝ Կիեւ նախանշված այցի նախօրեին կայացած զրույցի ընթացքում քննարկվել են, մասնավորապես, որոշ քայլեր, որոնք Ռուսաստանն ու Գերմանիան կարող են ձեռնարկել՝ մարտական գործողությունների շուտափույթ դադարեցման եւ ուկրաինական ներքաղաքական երկխոսություն հաստատման համար:
«Պուտինն ընդգծեց, որ հաշվի առնելով Ուկրաինայի հարավ-արեւելքում մարդասիրական ճգնաժամ ապրողներին ռուսական օգնության տրամադրման հարցում Կիեւի բացահայտ հապաղումը՝ որոշում է կայացվել ավտոշարասյուն ուղարկելու մասին: Հետագա ձգձգումն անթույլատրելի կլիներ»,- նշվում է Կրելմի հաղորդագրության մեջ:
Զրույցի ընթացքում կողմերը նաեւ լուրջ անհանգստություն են հայտնել Դոնեցկի եւ Լուգանսկի մարզերում տիրող իրավիճակի առնչությամբ: Կրեմլի համաձայն, Պուտինն ու Մերկելը պայմանավորվել են շարունակել կապ պահպանել՝ ուկրաինական խնդիրը քննարկելու համար:
