Ռուսաստան-Վրաստան-Հայաստան երկաթուղին ռազմավարական նշանակություն կունենա, այդ պատճառով Վրաստանում չեն ցանկանա, որպեսզի գոնե հիմա այն գործի: NEWS.am-ի թղթակցի հետ զրույցում նման կարծիք հայտնեց Սուխումի հայ համայնքի նախագահ Սուրեն Կերսելյանը՝ անդրադառնալով Աբխազիայի նորընտիր նախագահ Ռաուլ Հաջիմբայի՝ երկաթուղին վերականգնելու պատրաստակամության մասին հայտարարությանը:
Նրա խոսքով, այս երկաթուղին ոչ միայն միացնում է Մոսկվան ու Երեւանը, այլեւ այդ համատեքստում նախագծվում է նաեւ Մոսկվա-Թեհրան կապը: «Ինչ վերաբերվում է աբխազական կողմին, ապա այստեղ դեմ չեն երկաթուղու բացմանը: Աբխազիան այդ դիտարկում է որպես հնարավորություն ե'ւ իր, ե'ւ Հայաստանի համար: Հաղորդակցման ուղիները պետք է գործեն: Այլ հարց է, որ այսօր, ամենայն հավանականությամբ, Վրաստանը կքննադատի նման որոշումը»,- նշեց Սուրեն Կերսելյանը՝ եւս մեկ անգամ հավելելով, որ աբխազական կողմը պատրաստ է աշխատել այդ ուղղությամբ:
Նշենք, որ ամերիկյան Ազգային-ժողովրդավարական ինստիտուտի (NDI) կողմից օգոստոսի 25-ին հրապարակված հարցման համաձայն, Աբխազիայի տարածքով Վրաստանի եւ Ռուսաստանի միջեւ երկաթուղային ուղիղ հաղորդակցության վերականգնմանը կողմ է Վրաստանի քաղաքացիների մեծ մասը՝ հարցվածների 65%-ը:
Աբխազիայի տարածքով երկաթուղային հաղորդակցության վերականգնման թեման, որն ընդհատված է ավելի քան 20 տարի, արդիական է դարձել Վրաստանի Դարիալի կիրճի իրավիճակի ֆոնին: Վերջին երեք ամիսների ընթացքում սողանքների հետեւանքով Վրաստանը Ռուսաստանի կապող ճանապարհը երկրորդ անգամ դադարում է գործել:
Հունիսին Վրաստանի հաշտեցման եւ քաղաքացիական իրավահավասարության հարցերի նախարար Պաատա Զաքարեիշվիլին հայտարարել էր, որ Աբխազիայի տարածքով երկաթուղային հաղորդակցության հարցը դեռեւս հստակ քննարկման փուլում չէ, չնայած տեսանելի ապագայում այն կարող է Վրաստանի եւ Ռուսաստանի միջեւ քննարկման առարկա դառնալ: