Հայաստանում Ռուսաստանի արտակարգ եւ լիազոր դեսպան Իվան Վոլինկինը ներքին համոզմունք ունի, որ Հայաստանի եւ Ռուսաստանի միջեւ երկաթուղային ուղղակի կապի վերականգնումն Աբխազիայի եւ Վրաստանի տարածքով, քաղաքական եւ տնտեսական տեսանկյունից օգտակար կլինի տարածաշրջանի բոլոր երկրների համար, օգոստոսի 26-ին լրագրողներին հայտնել է դեսպանը:
Ըստ նրա՝ վերոնշյալ երկաթուղային կապը վերականգնելու համար, անհրաժեշտ է լուրջ ծրագիր մշակել: «Պետք է մշակել այս նախագծի տնտեսական, տեխնիկական եւ ֆինանսական ցուցանիշները, միայն դրանից հետո կարելի է խոսել՝ նպատակահարմար է այն, թե ոչ: Քանի որ լինում է այնպես, որ ինչ-որ նախագիծ ավելի թանկ է լինում, եւ երբեմն այն տնտեսապես ոչ շահավետ է դառնում», - նշել է Վոլինկինը:
Խոսելով վրացական կողմի դիրքորոշման մասին, որը կարող է բացասական վերաբերվել այս հարցին, ՌԴ դեսպանն ընդգծել է. «Կարծում եմ, որ փող հաշվել իմացող բոլոր ողջամիտ մարդիկ երկաթուղու վերականգնման նախագիծը ճիշտ կհամարեն եւ համապատասխան քայլեր կձեռնարկեն»: