Եթե վախենում եք թռիչքից, տեսեք, թե ինչ է տեղի ունեցել մեքսիկացի զինվորականի հետ: Ցատկելով ինքնաթիռից, որը թռչում էր 900 մետր բարձրությամբ, նա ճոպաններով կախվել է օդանավից: Սա շատ ավելի սարսափելի է, քան թռիչքը հարմարավետ օդանավում: Այս մասին գրում են «Mirror»-ի հեղինակները:
Մեքսիկացի 10 զինվորականներ հաջողությամբ պարաշյուտով ցատկել են տեղական ՌՕՈւ ինքնաթիռից: Սակայն դեսանտներից մեկի բախտը չի բերել: Թռիչքի ընթացքում նրա պարաշյուտի ճոպանը փաթաթվել է օդանավին: Մի քանի րոպե տղամարդը սարսափահար տատանվել է օդում, ինչպես լարից կախված փափուկ խաղալիքը: Մեքսիկացին ամեն պահի կարող էր ընկնել հսկայական բարձրությունից:
Ըստ «Vesti.ru»-ի, դեսանտային խմբի ղեկավարի խոսքով՝ բարդ հնարքների շնորհիվ օդանավում գտնվող զինվորականներին հաջողվել է պարաշյուտիստին ինքնաթիռ վերադարձնել: Զինվորականը չի տուժել, սակայն տեղափոխվել է հիվանդանոց, որպեսզի վերականգնվի ցնցումից հետո: Մեքսիկայի ռազմաօդային ուժերում հրաժարվել են մեկնաբանել այս տեսագրությունը եւ չեն հաղորդել, թե որտեղ է տեղի ունեցել միջադեպը: