Իսրայելական արտադրության «Hermes 450» անօդաչու թռչող սարքը, որին հարվածել էին օգոստոսի 23-ին Իրանի կենտրոնական հատվածում գտնվող ուրանի հարստացման օբյեկտի վրա, դուրս է եկել ադրբեջանական Նախիջեւանի շրջանում գտնվող ավիաբազայից: Այս մասին հաղորդում է «DEBKAfile» կայքը՝ վկայակոչելով իր ռազմական, ինչպես նաեւ Իրանի առկա աղբյուրներին:
Փորձարկումները, որոնք անցկացրել են իրանական ավիացիոն փորձագետներն ու հատուկ ծառայությունների աշխատակիցները, ցույց են տվել, որ Իրանական հեղափոխության պահապանների խմբի հրամանատարները շտապել են եզրակացություններ կատարելիս՝ հայտնելով, թե անօդաչու սարքը դուրս է եկել Սաուդյան Արաբիայից:
Իրանի, Հայաստանի եւ Թուրքիայի հետ սահմանակից Նախիջեւանի շրջանում փոքր ռազմական ավիաբազա կա: Երեք տարի առաջ «Hermes 450» տեսակի մեկ այլ անօդաչու սարք այնտեղից ուղղվել էր դեպի Հայաստան, որտեղ մեր հակաօդային պաշտպանության ուժերը հարվածել էին դրան:
Օգոստոսի 25-ի հայտարարության մեջ Հեղափոխության պահապանների ռազմաօդային ուժերի հրամանատար, գեներալ Ամիր Ալի Հաջիզադեն նշել էր, որ անօդաչու սարքն Իսրայելից դուրս չի եկել, սակայն չի հստակեցրել, թե որտեղից: Նա նաեւ չի նշել, արդյո՞ք անօդաչու սարքը պատկանում է Իսրայելին, թե՝ ոչ, միայն հայտարարելով, որ սարքն իսրայելական «Hermes 450» արտադրության էր՝ թռիչքի ավելի քան 800 կմ շառավղով:
«DEBKAfile» կայքի համաձայն՝ Թեհրանում դժգոհ են Իրանի միջուկային օբյեկտների վրա Նախիջեւանից անօդաչու սարքերի մշտական թռիչքների դեմ իրենց անօգնականությունից: Անօդաչու թռչող սարքերը չափում են ռադիոակտիվ ճառագայթման մակարդակը՝ ուրանի հարստացման իրանական ծրագրի հստակ հաշվարկի համար:
