Վրաստանի Քոբուլեթի քաղաքում օգոստոսի 16-ին տեղի ունեցած ողբերգական ավտովթարի հետեւանքով վիրավորված 12-ամյա Անի Խառատյանի վիճակը ծանր կայուն է: Այս մասին NEWS.am-ին ասաց Լոռու մարզպետ Արթուր Նալբանդյանը, որի աշխատակիցն է Անիի հայրը՝ մեքենայի վարորդ Սամվել Խառատյանը:

«Սամվել Խառատյանը Հայաստանում է, 2 երեխաները դեռ հիվանդանոցում են. Անիի վիճակն արդեն կայունանում է, բայց ծանր է, իսկ մյուս երեխան ծանր մարմնական վնասվածքներ չունի: Սամվելին են թույլ են տվել մնալ Հայաստանում, իսկ Վրաստանում քննություն է ընթանում, ընթացքի մասին տեղյակ չեմ»,- ասաց նա:

Նշենք, որ ավտովթարից մահացած վրացի մոտոցիկլավարի ընտանիքը բողոք է ներկայացրել Հայաստանի քաղաքացի Սամվել Խառատյանի դեմ, ինչի հետեւանքով էլ վերջինիս թույլ չէին տալիս գալ Հայաստան՝ մասնակցելու վթարի ժամանակ մահացած իր 13-ամյա որդու հուղարկավորությանը: Թույլտվությունը ստացվել էր միայն օգոստոսի 20-ին՝ հյուպատոսի, դեսպանի եւ պատգամավորների երաշխավորությամբ:

Ավելի վաղ NEWS.am-ը հայտնել էր, որ օգոստոսի 16-ին, ժամը 14.35-ին Վրաստանի Հանրապետության ՆԳՆ ԱԻ դեպարտամենտից տեղեկություն է ստացել, որ ժամը 12.59-ին Քոբուլեթի քաղաքի Ռուսթավելի փողոցում վթար է եղել. բախվել են մոտոցիկլետը եւ «Հունդայի» մակնիշի 77 VV 447 մակնիշի ավտոմեքենան:

Վթարի հետեւանքով Հայաստանի քաղաքացի՝ 13-ամյա Քոչար Խառատյանը տեղում մահացել է, իսկ 8-ամյա Ալեքսանդրն ու 12-ամյա Անի Խառատյանները տեղափոխվել են Քոբուլեթի քաղաքի ԲԿ: Մեկ օր անց Անի Խառատյանը տեղափոխվել է Երեւան: