ՀԱՊԿ խաղաղարար ուժերը պատրաստ են ցանկացած բարդ գործողությունների, այդ թվում՝ մասնակից-երկրների սահմաններից դուրս, ներառյալ՝ Ուկրաինայում, սակայն դրանք օգտագործելու մասին որոշման ընդունումը գտնվում է Հավաքական անվտանգության խորհրդի իրավասության տակ, որի մեջ ընդգրկված են անդամ-երկրների առաջնորդները: Այդ մասին «ՌԻԱ Նովոստին» հայտարարել է ՀԱՊԿ-ի գլխավոր քարտուղար Նիկոլայ Բորդյուժան:
«ՀԱՊԿ-ի խաղաղարար ուժերը ձեւավորվել են մի քանի տարի առաջ: Դրանց կազմում եղած զինծառայողները անհատապես լավ պատրաստված են եւ հագեցած անհրաժեշտ սպառազինությամբ եւ տեխնիկական միջոցներով: Խաղաղարար առաջադրանքներ լուծելու, (այդ թվում՝ հավաքական ուժերի) նրանց ունակությունը բարձր մակարդակի վրա է: Կարելի է փաստել, որ նրանք պատրաստ են ցանկացած բարդության խաղաղարար գործողությունների, ինչը եւս մեկ անգամ հաստատեցին Ղրղզստանի Հանրապետության տարածքում անցկացված համատեղ զորավարժությունների արդյունքները», - ասել է Բորդյուժան՝ ի պատասխան Ուկրաինայի արեւելքի հակամարտությունում մարդկային զոհերին վերջ դնելու նպատակով ՀԱՊԿ խաղաղարներին օգտագործելու հնարավորության մասին հարցին:
«ՀԱՊԿ-ի խաղաղարար ուժերի կիրառման հնարավորությունը կազմակերպության Հավաքական անվտանգության խորհրդի՝ ՀԱՊԿ-ի բարձրագույն մարմնի առանձնաշնորհն է: Նրանց համատեղ որոշմամբ Խաղաղարար ուժերը կարող են տեղակայվել ինչպես անդամ պետությունների տարածքում, այնպես էլ դրանցից դուրս», - հիշեցրել է Բորդյուժան: