Հայաստանում դպրոցական պարագաների վաճառքում խելացի մարքեթինգ չկա, օգոստոսի 29-ին մամուլի ասուլիսում հայտարարել է «Հայաստանի սպառողների միություն» ՀԿ-ի նախագահ Արմեն Պողոսյանը:
«Սեպտեմբերի 1-ին, որպես կանոն, դպրոցական պարագաները զգալի թանկանում են: Առավել եւս եթե այստեղ ներառենք նաեւ ծաղիկները: Մեր դիտարկմամբ՝ այդ ապրանքները միջինը թանկանում են 5-10%: Բայց ո՞ւմ հաշվին է դա կատարվում: Հարկավոր է իրերն իրենց անունով կոչել: Մեր քաղաքացիների 70-80%-ը ոչ թե «բավական բարեկեցիկ պայմաններում չեն», այլ շատ վատ պայմաններում են ապրում: Բայց եթե ձեր երեխան տեսնում է, որ կողքին նստած դասընկերը նոր գրչատուփ ու պայուսակ ունի, իսկ իրենը հինն է, այն էլ՝ եթե ունի, ինչպես դուք ձեզ կզգաք: Ահա եւ ծնողները ծախսեր են անում: Բայց ինչու, եթե խանութները կարող են խելամիտ եկամուտ ստանալ սեպտեմբերին ընդառաջ գներն իջեցնելով: Չէ որ իրենց համար էլ լավ կլինի, գնորդները կավելանան: 20 տարի է մենք կրկնում ենք մարքեթինգ բառը: Սկզբում ինչ-որ մեկին այն թվում էր խրթին եւ օտարոտի: Այժմ այն կարծես թե գոյատեւեց, բայց բովանդակությունը, ինչպես երեւում է, շատ առեւտրականներ առայսօր չգիտեն», - նշել է նա:
Կան նաեւ սուբյեկտիվ պատճառներ. Հայկական շուկան խիստ փոքր է գները ծավալի հաշվին իջեցնելու համար: Բայց մյուս կողմից՝ այդ շուկան անվերահսկելի է, ինչ-որ մեկն աշխատում է, բայց ոչ այնքան մաքուր: Մյուս կողմից, շուկայում մենաշնորհ չկա, եւ որոշ ջանքերի արդյունքում, խանութներում շրջելով, գնորդը կարող է ապրանքը հարկ եղած գնով ձեռք բերել:
«Բայց կարծում եմ, պետական մարմիններն էլ անելիքներ ունեն՝ օրինակ ստուգեն, թե որքանով է մաքուր աշխատում Գեւորգը եւ արդյոք իր անազնվությամբ չի խանգարում Արմենին կամ Աշոտին:
8-10% շահույթը նորմալ է: Բայց եթե ինչ-որ մեկի մոտ այն 30% է, դա պետք է կասկած հարուցի: Նշանակում է՝ շրջանառության մի մասը նրա մոտ ստվերային է»,- նշելէ Պողոսյանը:
