Երկրապահ կամավորների միությունը պետք չէ համեմատել այլ կառույցների, առավել եւս գոյություն չունեցող միությունների հետ: NEWS.am-ի հետ զրույցում ԱԺ ԲՀԿ-ական պատգամավորներ Ռուբեն Գեւորգյանի եւ Ռուստամ Գապարյանի նորաստեղծ միություններին այսպես արձագանքեց ԵԿՄ մամուլի պատասխանատու Վարդան Վարդանյանը:
«Ձեր մատնանշած կառույցների նման կառույցներ տարբեր տարիների մարդիկ փորձում են ստեղծել, դժբախտաբար չի ստացվում: Երկրապահ կամավորների միությունը, ի տարբերություն այլ կառույցների, օրվա հրամայականով է ստեղծվել, ժամանակի պահանջով, արյան կանչով, ստեղծել է Սպարապետ Վազգեն Սարգսյանը եւ հենց նրա ոգով էլ շարունակում ենք առաջնորդվել: Մենք այսօր ամենազդեցիկ, ամենամարդաշատ հասարակական կազմակերպությունն ենք հանրապետությունում: Հետեւաբար, տեղին չէ մեզ համեմատել այլ, մանավանդ գոյություն չունեցող միությունների հետ, երբ 4 հոգով դուրս են գալիս, ուզում են մի բան ստեղծել, 5-րդ մարդ չեն ճարում, ինքնալուծարվում են, հետո նորից են փորձում: Բայց ԵԿՄ կողջունի, թե նման կառույց ստեղծվի, բնականաբար, խանդով չենք վերաբերվում, կողջունեմ»,- ասաց նա:
Մեր դիտարկմանը, թե կոնկրետ «Նվիրյալների միությունը» լուծարվեց՝ ԵԿՄ նախագահ Մանվել Գրիգորյանի պատճառով՝ Վարդան Վարդանյանը նշեց, որ այդպիսի բան չի կարող լինել. գեներալ Մանվել Գրիգորյանը ողջունում է նման կառույցների ստեղծումը:
Նշենք, որ ԱԺ ԲՀԿ-ական պատգամավորներ Ռուբեն Գեւորգյանն ու Ռուստամ Գասպարյանն ապրիլին ցանկանում էին ստեղծել «Նվիրյալների միություն» ՀԿ, սակայն այն փակվեց ստեղծվելուց մեկ ամիս անց: Ռուբեն Գեւորգյանը պնդում է, որ Գագիկ Ծառուկյանը ոչ մի կապ չունի ձախողման հետ, Ռուստամ Գասպարյանն ասում է, որ այն փորձեցին քաղաքականացնել, կապել ԲՀԿ առաջնորդի անվան հետ, այդ պատճառով էլ այն փակվեց: Այս պահին Ռուբեն Գեւորգյանն ունի «Երդվյալ ազատամարտիկների» միություն, իսկ Ռուստամ Գասպարյանը՝ Ազատամարտիկների դաշինք: