Ռուսական զորքերի Ուկրաինա ներթափանցման մասին հաղորդագրություններով պայմանավորված՝ գերմանացի քաղաքական գործիչները խստացնում են Մոսկվայի նկատմամբ իրենց վարքագիծը, հաղորդում է Deutsche Welle-ի ռուսական ծառայությունը:
«Ռուսաստանը ներխուժել է Ուկրաինա: Այժմ ոչ մի կասկած չկա, որ զգալի քանակությամբ ռուս զինվորներ են անցել Ուկրաինայի տարածք», հայտարարել է բունդեսթագի արտաքին քաղաքականության հարցերով հանձնաժողովի նախագահ Նորբերթ Ռյոթգենը:
Նա կոչ է արել անհապաղ ընդլայնել Ռուսաստանի դեմ միջազգային պատժամիջոցները՝ Պուտինի վրա ճնշում գործադրելու նպատակով: «Պուտինը մանիպուլյացիայի է ենթարկում Եվրոպան», - ընդգծել է քրիստոնյա-դեմոկրատական քաղաքական գործիչը:
Եվրախորհրդարանի նախագահ Մարտին Շուլցը անհանգստություն է հայտնել, որ իրավիճակը վերհսկողությունից դուրս կգա:
«Եթե Ուկրաինայի եւ Ռուսաստանի միջեւ ուղիղ զինված հակամարտություն սկսվի, ապա անվերահսկելի էսկալացիայի սպառնալիք է առաջանում», - նախազգուշացրել է գերմանացի սոցիալ-դեմոկրատական քաղաքական գործիչը:
