Երեւանի քաղաքապետի խորհրդական Արայիկ Քոթանջյանը շարունակում է գաղտնի պահել, թե հունիսի 6-ին ինչու է իր որդին՝ Սամվել Քոթանջյանը, զենք օգտագործել: NEWS.am-ի թղթակցի հետ զրույցում քաղաքապետի խորհրդականը նշեց, որ չի ցանկանում իր տան մոտ տեղի ունեցածի մասին խոսել:
«Ինչների՞դ ա պետք, որ իմանաք, գործ ա, իր ընթացքով գնում ա էլի, չեմ ուզում խոսել, դրա համար էլ չեմ խոսում»,- ասաց նա:
Հարցը, թե ընդունում է արդյոք իր որդուն առաջադրված մեղադրանքները՝ Արայիկ Քոթանջյանն անպատասխան թողեց եւ անջատեց հեռախոսը:
Նշենք, որ 24-ամյա Սամվել Քոթանջյանին մեղադրանք է առաջադրվել ապօրինի զենք կրելու եւ զենքի գործադրմամբ խուլիգանություն կատարելու համար: Նա ազատ է արձակվել երկու պատգամավորների՝ ՀՀԿ-ական Ռոբերտ Սարգսյանի եւ Գագիկ Մելիքյանի անձնական երաշխավորությամբ:
Հիշեցնենք, որ հունիսի 6-ին ժամը 22.50-ին Կ. Ուլնեցու փողոցի թիվ 74 շենքի բակում, անհայտ անձանց միջեւ տեղի ունեցած վիճաբանության ժամանակ, Քոթանջյանը ատրճանակից մի քանի անգամ կրակել էր օդ, ինչից հետո վիճաբանողները դիմել էին փախուստի: Դեպքի վայրի զննությամբ հայտնաբերվել էին 9 մմ տրամաչափի ատրճանակի 3 պարկուճ եւ 1 գնդակ: Հունիսի 10-ի երեկոյան օդ կրակած Սամվել Քոթանջյանն ինքնակամ ներկայացել էր ոստիկանություն:
