Ադրբեջանի նախագահի աշխատակազմը լրատվամիջոցներին սպառնում է պատժել անհնազանդության համար:
haqqin.az-ի փոխանցմամբ՝ նախագահի աշխատակազմի ղեկավարի նախագահությամբ լրատվամիջոցների եւ նախարարությունների ու գերատեսչությունների մամուլի ծառայությունների ղեկավարների խորհրդակցություն է տեղի ունեցել: Խորհրդակցությանը մասնակցել են նախագահի աշխատակազմի պետի տեղակալ Նովրուզ Մամեդովը, նախագահի աշխատակազմի հասարակական-քաղաքական բաժնի ղեկավար Ալի Հասանովը, իրավապահ մարմինների հետ աշխատանքների գծով բաժնի ղեկավար Ֆուադ Ալեսքերովը, քաղաքական վերլուծության եւ տեղեկատվական ապահովվածության բաժնի ղեկավար Սահադաթ Յուսիֆովան, օրենսդրության եւ իրավական փորձաքննության հարցերով բաժնի պետ Շահին Ալիեւը եւ այլք:
Նախագահական աշխատակազմի ղեկավարը մանրամասնորեն անդրադարձել է օգոստոսի սկզբին ղարաբաղյան հակամարտության գոտում լարվածության սրացման ժամանակ լրատվամիջոցների, մասնավորապես՝ տեղեկատվական կայքերի աշխատանքին:
Ռ. Մեհթիեւը մասնակիցների ուշադրությանն է հրավիրել ադրբեջանական օրենսդրության, մասնավորապես՝ պետական գաղտնիքի մասին օրենքի պահանջները խախտող շատ կայքերի ոչ պրոֆեսիոնալ եւ ապօրինի գործունեությանը: Նրա խոսքով՝ այդ կայքերը փաստացիորեն հայկական հետախուզությանը տեղեկություններ հաղորդող գործակալների դեր են կատարում:
Մեհթիեւը հայտարարել է, որ որոշ լրատվամիջոցներ, ի շահ իրավիճակային շահերի, փորձել են շրջանառել օգոստոսյան իրադարձությունների չճշտված տեղեկություններ, քաղաքացիական հասարակության շրջանում անկարգություններ հրահրել, ինչպես նաեւ «թշնամու շահերից բխող» տեղեկություններ տարածել:
Վարչակազմի ղեկավարը լրատվամիջոցներին նախազգուշացրել է, որ սահմանադրական կարգի, ինքնիշխանության, տարածքային ամբողջականության եւ պետական անկախության, ինչպես նաեւ ազգային շահերի դեմ ուղղված ցանկացած փորձ կպատժվի օրենքի ողջ խստությամբ:
Մեհթիեւը քննադատել է «Ադրբեջանի մասին կեղծիք եւ հերյուրանք» տարածող որոշ ռազմական փորձագետների գործունեությունը: Մասնավորապես, նշել է փորձագետ Ուզեիր Ջաֆարովին եւ պաշտպանության նախկին փոխնախարար Իսա Սադիգովին:
Ռամիզ Մեհթիեւը նաեւ քննադատության է ենթարկել «Ազադլգ» (Ազատություն) ռադիոկայանի եւ համանուն ընդդիմադիր թերթի գործունեությունը: