Հայաստանի նախագահ Սերժ Սարգսյանը քաղաքական ավերիչ սխալ կանի, եթե համաձայնվի երկիրը դարձնել խորհրդարանական: NEWS.am-ի հետ զրույցում նման տեսակետ հայտնեց «Նոր ժամանակներ» կուսակցության նախագահ Արամ Կարապետյանը՝ պատասխանելով հարցին՝ արդյոք Սահմանադրական բարեփոխումների շուրջ քառյակի տարակարծությունը կբերի պառակտման:
«Նախ ասեմ, որ Սերժ Սարգսյանն իր դիրքերը չի ամրապնդում՝ խորհրդարանական համակարգ ստեղծելով, քանի որ իմ տեղեկություևններով՝ իշխանությունների ներսում էլ տարաձայնություններ էլ կան: Այս վերջին ընթացքում նախագահը երկու քաղաքական սխալ է արել. Էրդողանի երդմնակալությանը մասնակցել ենք Էդվարդ Նալբանդյանի մակարդակով, երկրորդ կոպտագույն սխալը կլինի, եթե նախագահը համաձայնվի, որ Հայաստանը դառնա խորհրդարանական երկիր: Ինչ վերաբերվում է քառյակին, ապա նրանք չեն պառակտվի, քանի որ այս կերպ ձեռնտու է իրենց: Բացի դրանից էլ՝ Քոչարյանն է պահում քառյակին»,- ասաց նա:
Նշենք, որ քառյակից ՀՅԴ-ն կողմ է Սահմանադրական բարեփոխումներին, իսկ մյուս երեք ուժերը դեմ են: Կա կարծիք, որ այս տարակարծության պայմաններում «հրաշալի քառյակը» հնարավոր է պառակտվի:
