Ուկրաինայում ձերբակալված 9 ռուս դեսանտայինները Ռուսաստան են վերադարձել: Այս մասին գրում է «ՌԻԱ Նովոստի»-ն՝ վկայակոչելով օդադեսանտային ուժերի հրամանատարի տեղակալ, գեներալ-մայոր Ալեքսեյ Ռագոզինին:
«Բանակցությունները շատ բարդ էին: Սակայն առողջ դատողությունը հաղթանակեց, եւ ամեն ինչ լավ ավարտվեց: Գլխավորն այն է, որ բոլոր տղաներն այժմ մեզ հետ են, Ռուսաստանում: Ցանկանում եմ ընդգծել, որ մենք մերոնց չենք լքում»,- ասել է նա:
Ռագոզինի խոսքով՝ ռուսական կողմը ձերբակալության առաջին րոպեներից անում էր ամեն ինչ, որպեսզի որքան հնարավոր է՝ արագ ռուսներին տուն վերադարձնի:
Ռուսաստանն իր հերթին ուկրաինական կողմին 63 մարդ է փոխանցել: Ըստ ռուսական լրատվամիջոցների, նրանք զինվորներ եւ սպաներ են, որոնք նախկինում Ուկրաինայի արեւելքից ռուսամետ ակտիվիստների շրջափակումից փախել են Ռուսաստանի տարածք:
Օգոստոսի 26-ին Ուկրաինայի Անվտանգության ծառայությունը հաղորդել է ռուս-ուկրաինական սահմանին 10 ռուս դեսանտայինների ձերբակալության մասին՝ փաստաթղթերով ու զենքով: Ռուսաստանի պաշտպանության նախարարությունում պարզաբանել են, որ դեսանտայինները հատել են սահմանն ու հայտնվել Ուկրաինայի տարածքում պարեկային ծառայության ընթացքում: