ԱՄՆ Անվտանգության Խորհրդի մամուլի քարտուղար Քեթլին Հեյդենը Ռուսաստանին կոչ է արել իր զինված խմբավորումները դուրս բերել Ուկրաինայից:
«Մենք ողջունում ենք Եվրամիության միասնականությունը, որը հայտարարում է Ուկրաինայի ինքնիշխանության եւ տարածքային ամբողջականության վճռական պաշտպանության մասին եւ նոր պատժամիջոցներ է պատրաստում, որոնք շուտով կքննարկվեն: Մենք սերտ համագործակցում ենք ԵՄ-ի եւ այլ գործընկերների հետ, որպեսզի Ռուսաստանը պատասխան տա իր անօրինական գործողությունների համար Ուկրաինայում, այդ թվում՝ հավելյալ տնտեսական պատժամիջոցների միջոցով: Մենք շարունակում ենք աջակցել Ուկրաինային ճգնաժամի դիվանագիտական կարգավորման որոնումներում եւ կոչ ենք անում Ռուսաստանին անհապաղ Ուկրաինայից դուրս բերել իր զինված խմբավորումները՝ ներառյալ մարդկային ուժն ու սպառազինությունները, եւ վերջ դնել անջատողականների հանցավոր աջակցությանը»,- Հեյդենի խոսքերն է մեջբերում «Ամերիկայի ձայն»-ը:
Միաժամանակ, Սենատի արտաքին հարաբերությունների հանձնաժողովի նախագահ Ռոբերտ Մենենդեսն այս հանգստյան օրերին այցելել է Էստոնիա, Լեհաստան եւ Ուկրաինա: Կիեւում նա կոչ է արել ԱՄՆ նախագահին՝ սկսել Ուկրաինային զենք մատակարարել, ինչպես նաեւ ընդլայնել ռուսական տնտեսության բանկային, տնտեսական ու ռազմական հատվածների դեմ պատժամիջոցները:
