Եթե Թուրքիայի նախագահ Ռեջեփ Թայիփ Էրդողանը ընդունի հրավերը եւ այցելի Հայաստան՝ որպես Թուրքիայի նոր՝ արդարության քաղաքականության խորհրդանիշ, դա դրական երեւույթ կլինի: Այս մասին NEWS.am-ի թղթակցի հետ զրույցում ասել է ԱՄՆ Հայ դատի հանձնախմբի գործադիր տնօրեն Արամ Համբարյանը:
«Բայց եթե նա գա Հայաստան ՝ ցույց տալու համար, որ կարող է հակահայկական արտահայտություններ անել, իսկ հայերը կծափահարեն նրան Հայաստան այցելելու համար, դա անընդունելի է», - հավելել է Համբարյանը:
Նրա համոզմամբ՝ Հայաստանը չպետք է մասնակցի Էրդողանի քաղաքական խաղերին: «Նա բացեիբաց հայտարարեց, որ հայ լինելը վիրավորանք է: Ես վստահ չեմ, որ այդ մարդն իր երդմնակալությանը ցանկանում էր Հայաստանի ներկայացուցչի տեսնել: Նախքան ինչ-որ մեկին Թուրքիա ուղարկելը Հայաստանը պետք է հավաստիացում ստանար, որ դա ցանկանում է թուրքական կողմը:
Եթե Էրդողանը մեզ չի հարգում, ինչու պետք է մենք ներկա գտնվենք նրա երդմնակալությանը: Եթե Էրդողանը ներողություն խնդրեր կամ արդարանար, թե ինչու է այդպես ասել, դա այլ բան կլիներ»,- նշել է Արամ Համբարյանը:
Ըստ նրա՝ չի կարելի այդպես խոսել այլ ժողովրդի մասին, եւ հայն էլ չպետք է այդպես արտահայտվի թուրքերի մասին: Նախագահները, ըստ Համբարյանի, առավել եւս իրավունք չունեն այդկերպ արտահայտվելու: Նա նաեւ հավելել է, որ Էրդողանի այս տարվա ապրիլի 23-ի ուղերձը նրա քաղաքական խաղի մի մասն էր:
Հիշեցնենք, ՀՀ նախագահ Սերժ Սարգսյանն արտգործնախարար Էդվարդ Նալբանդյանի միջոցով թուրքական պետության ղեկավարին 2015թ. ապրիլի 24-ին Հայաստան այցելելու հրավեր էր ուղարկել:
