Հայաստանի եւ Ավստրիայի արտգործնախարարները սեպտեմբերի 8-ին կայացած հանդիպման ընթացքում երկկողմ համագործակցության օրակարգային հարցերի լայն շրջանակ են քննարկել: Այդ մասին այսօր ՝ սեպտեմբերի 8-ին, իր ավստրիացի գործընկեր Սեբաստիան Կուրցի հետ համատեղ մամուլի ասուլիսի ժամանակ հայտարարեց ՀՀ արտգործնախարար Էդվարդ Նալբանդյանը:
Նրա խոսքով՝ սա երկկողմանի հարաբերությունների օրակարգը, երկու երկրների փոխայցելությունների ընթացքում ձեռքբերված պայմանավորվածությունների իրականացման ընթացքը քննարկելու լավ հնարավորություն էր: Կողմերը տարածաշրջանային եւ միջազգային հարցերի շուրջ փոխանակվեցին կարծիքներով: Էդվարդ Նալբանդյանը գոհունակություն հայտնեց, որ ավստրիացի նախարարի պատվիրակության կազմում, մասնավորապես էներգետիկայի ոլորտը ներկայացնող գործարարների մեծ խումբ կա:
Իր հերթին, Սեբաստիան Կուրցը նշել է, որ երկրում հետաքրքիր իրավիճակ է եւ Եվրոպան պատրաստ է փոխգործակցել Հայաստանի հետ: Նրա խոսքով՝ հանրապետության համար Ռուսաստանի հետ հարաբերությունները կարեւոր են, սակայն կարեւոր է նաեւ Եվրոպայի հետ կապերի ընդլայնումը: Ավստրիայի արտգործնախարարը կարծում է, որ երկու կողմերի միջեւ տնտեսական համագործակցության զարգացման համար շատ լավ հնարավորություններ կան, ինչի մասին վկայում է պատվիրակության կազմը: Ավստրիացի ձեռնարկատերերը շահագրգռված են հարաբերությունների զարգացմամբ, նշեց նախարարը: Նրա խոսքով՝ հենց դրան է ուղղված Զարգացման ավստրիական գործակալության Երեւանի մասնաճյուղի գործունեությունը: