Թուրքիայի Ռադիոհեռուստաընկերությունների բարձրագույն խորհրդի (RTUK) որոշմամբ նախընտրական շրջանում մի հեռուստաընկերության եթերում հայերին ուղղված Թուրքիայի նախագահի նախկին թեկնածու Ռեջեփ Թայիփ Էրդողանի խոսքերում վիրավորական ոչինչ չկա:

Թուրքական Cumhuriyet պարբերականի փոխանցմամբ՝ Թուրքիայի Ռադիոհեռուստաընկերությունների բարձրագույն խորհրդում ընդդիմադիր կուսակցություններից ընտրված անդամները պահանջել էին խորհրդի օրակարգում ներառել հայերին վիրավորող Ռեջեփ Թայիփ Էրդողանի հայտնի հարցազրույցը: Ընդդիմադիր անդամները պնդել են, որ Էրդողանն իր խոսքերով վիրավորել է հայերին:

Սակայն RTUK-ի նիստում իշխող կուսակցության անդամները համաձայն չեն եղել ընդդիմադիր անդամների պնդումների հետ՝ պնդելով, թե Էրդողանի խոսքը տեղավորվել է էթիկայի շրջանակներում:

Այս պնդումը դրվել է քվեարկության եւ անցել, քանի որ անդամների մեծամասնությունը եղել են իշխող կուսակցության համակիրները:

Նշենք, որ նախընտրական շրջանում նախագահի թեկնածու Ռեջեփ Թայիփ Էրդողանը թուրքական Star TV եւ NTV հեռուստաընկերությունների համատեղ եթերում պատասխանելով հաղորդավարի հարցերին, անդրադարձել է նաեւ ժողովրդի կողմից քննարկվող իր արմատների հարցին: «Իմ արմատները Ռիզեից են: Ինձ ասում էին, թե վրացի եմ, ավելին, մեկը կանգնեց ավելի կեղտոտ բան ասաց՝ պնդելով, թե ես հայ եմ»,-ասել էր Ռեջեփ Թայիփ Էրդողանը: Էրդողանի այս խոսքերը մեծ արձագանքն են գտել թուրքական մամուլում եւ սոցկայքերում։